سنگ در جاناں پر ایسی ہو جبیں سائی

سنگ در جاناں پر ایسی ہو جبیں سائی

خود حسن پس پردہ ہو جائے تماشائی

میں ہوں شب فرقت ہی یا ہے مری تنہائی

ہے دیکھنے کے قابل یہ انجمن آرائی

ہر ذرہ ہے آئینہ اس حسن کے جلووں کا

وہ خود ہی تماشا ہے اور خود ہی تماشائی

تکمیل جنوں اے دل توہین محبت ہے

منزل پہ پہنچ جاتا ہے شوق کی رسوائی

ارباب وفا پہلے مرنے کا چلن سیکھیں

تب ان کو نوازے گا انداز مسیحائی

بہلانے کو بہلاؤں میں دل غم جاناں سے

کیا ہوگا جو یہ صورت اس دل کو نہ راس آئی

روتا ہے کبھی جامیؔ ہنستا ہے کبھی جامیؔ

دیوانہ تو دیوانہ سودائی تو سودائی