wahi jagah hai muqaddar ke aazmane ki

vahī jagah hai muqaddar ke āzmāne kī

jhukī huī hai jabīñ jahāñ zamāne kī

adā na dekho sitāroñ ke muskurāne kī

ye hai hasīn jhalak bijliyāñ girāne kī

fazā batātī hai tāroñ ke Duub jaane kī

ki sub.h-e-nau meñ bhī haiñ zulmateñ zamāne kī

jo māñgte the duā.eñ bahār aane kī

inhīñ ko fikr hai ab āshiyāñ bachāne kī

farāz-e-tūr se dār-o-rasan kī manzil tak

sadā.eñ guuñj rahī haiñ mire tarāne kī

diye haiñ husn ne kitne hasīn fareb magar

ga.ī na ishq kī aadat fareb khāne kī

ba-qadr-e-zarf badaltā hai rañg mastī kā

hai varna ek hī sahbā sharāb-ḳhāne kī

na kar zamāne kī taqlīd nā-ravā 'arshī'

ki tere haath meñ raftār hai zamāne kī

wahi jagah hai muqaddar ke aazmane ki

jhuki hui hai jabin jahan zamane ki

ada na dekho sitaron ke muskurane ki

ye hai hasin jhalak bijliyan girane ki

faza batati hai taron ke Dub jaane ki

ki subh-e-nau mein bhi hain zulmaten zamane ki

jo mangte the duaen bahaar aane ki

inhin ko fikr hai ab aashiyan bachane ki

faraaz-e-tur se dar-o-rasan ki manzil tak

sadaen gunj rahi hain mere tarane ki

diye hain husn ne kitne hasin fareb magar

gai na ishq ki aadat fareb khane ki

ba-qadr-e-zarf badalta hai rang masti ka

hai warna ek hi sahba sharab-KHane ki

na kar zamane ki taqlid na-rawa 'arshi'

ki tere hath mein raftar hai zamane ki