jahan mein tum sa hoga dusra kya

jahāñ meñ tum sā hogā dūsrā kyā

tumhīñ tum ho tumhārā pūchhnā kyā

sunegā koī ġham kā mājrā kyā

shikast shīsha-e-dil kī sadā kyā

mujhe merī nigāhoñ se chhupāyā

mazāq-e-dīd ye tujh ko huā kyā

karam jo aap kā chāhe vo de de

dil-e-be-mudda.ā māñge duā kyā

nazar ko kar na pāband-e-ta.ayyun

nazar kī ibtidā kyā intihā kyā

mohabbat zindagī hai zindagī hai

mohabbat meñ fanā kyā hai baqā kyā

nazar khoī huī thī bijliyoñ meñ

na.e parde gire parda uThā kyā

vafā dushman hai fitrat jin kī 'arshī'

zabāñ par un kī hai nām-e-ḳhudā kyā

jahan mein tum sa hoga dusra kya

tumhin tum ho tumhaara puchhna kya

sunega koi gham ka majra kya

shikast shisha-e-dil ki sada kya

mujhe meri nigahon se chhupaya

mazaq-e-did ye tujh ko hua kya

karam jo aap ka chahe wo de de

dil-e-be-muddaa mange dua kya

nazar ko kar na paband-e-tayyun

nazar ki ibtida kya intiha kya

mohabbat zindagi hai zindagi hai

mohabbat mein fana kya hai baqa kya

nazar khoi hui thi bijliyon mein

nae parde gire parda uTha kya

wafa dushman hai fitrat jin ki 'arshi'

zaban par un ki hai nam-e-KHuda kya