be-gana-e-haal-e-zabun ke liye aaina-e-mustaqibl ho ja

be-gāna-e-hāl-e-zabūñ ke liye ā.īna-e-mustaqibl ho jā

har gum-karda manzil ke liye tuuhī ḳhizr-e-manzil ho jā

ik hashr bapā karne ke liye āvāz-e-shikast-e-dil ho jā

qātil bhī jo dekhe ho bismil vo raqs-e-dil bismil ho jā

yā soz-e-dil parvāna ban yā sham.a-e-sar-e-mahfil ho jā

ya.anī duniyā-e-mohabbat meñ rahne ke tū qābil ho jā

har qalb kī tū bijlī ho jā har ruuh kī tū mastī ban jā

har dard kā tū darmāñ ban jā har armāñ kā hāsil ho jā

ban jā tū kabhī tasvīr-e-junūñ dikhlā tū kabhī zabt-e-āqil

ya.anī ho ravānī meñ dariyā ruk jaane meñ sāhil ho jā

rahbar kī zarūrat kyā tujh ko rahvār kī hājat kyā tujh ko

ḳhud hī jaada ḳhud hī rahrav ḳhud hī ḳhizr-e-manzil ho jā

gar diin kā sālik ho na sakā duniyā hī kā tū mālik ho jā

yā marne kā hāsil ho jā yā jiine kā hāsil ho jā

īsār-o-kHalq-o-muravavat kā putlā ban kar phir duniyā meñ

bismil ke liye ho vaj.h-e-sukūñ be-dil ke liye tū dil ho jā

me.ār-e-sadāqat ban kar phir tū jalva-numā ho duniyā meñ

phir banda-e-hirs-o-havā ke liye tamīz-e-haq-o-bātil ho jā

phir paikar-e-josh-e-jinnoñ ban kar ho jā duniyā kī rūh-e-ravāñ

phir ho ke shahīd-e-hubb-e-vatan zindoñ meñ tū shāmil ho jā

be-gana-e-haal-e-zabun ke liye aaina-e-mustaqibl ho ja

har gum-karda manzil ke liye tuhi KHizr-e-manzil ho ja

ek hashr bapa karne ke liye aawaz-e-shikast-e-dil ho ja

qatil bhi jo dekhe ho bismil wo raqs-e-dil bismil ho ja

ya soz-e-dil parwana ban ya shama-e-sar-e-mahfil ho ja

yani duniya-e-mohabbat mein rahne ke tu qabil ho ja

har qalb ki tu bijli ho ja har ruh ki tu masti ban ja

har dard ka tu darman ban ja har arman ka hasil ho ja

ban ja tu kabhi taswir-e-junun dikhla tu kabhi zabt-e-aqil

yani ho rawani mein dariya ruk jaane mein sahil ho ja

rahbar ki zarurat kya tujh ko rahwar ki hajat kya tujh ko

KHud hi jada KHud hi rahraw KHud hi KHizr-e-manzil ho ja

gar din ka salik ho na saka duniya hi ka tu malik ho ja

ya marne ka hasil ho ja ya jine ka hasil ho ja

isar-o-kHalq-o-murawawat ka putla ban kar phir duniya mein

bismil ke liye ho wajh-e-sukun be-dil ke liye tu dil ho ja

mear-e-sadaqat ban kar phir tu jalwa-numa ho duniya mein

phir banda-e-hirs-o-hawa ke liye tamiz-e-haq-o-baatil ho ja

phir paikar-e-josh-e-jinnon ban kar ho ja duniya ki ruh-e-rawan

phir ho ke shahid-e-hubb-e-watan zindon mein tu shamil ho ja