jhuTi masarraton ka samar le ke aae hain

jhūTī masarratoñ kā samar le ke aa.e haiñ

shahr-e-vafā se dīda-e-tar le ke aa.e haiñ

kis se kaheñ ki kitne hasīñ ḳhvāb chhīn kar

vo muzda-e-tulū'-e-sahar le ke aa.e haiñ

jab bhī farāz daar pe aa.ī vafā kī baat

dīvāne apnā kāsa-e-sar le ke aa.e haiñ

ehsās-e-nā-murādī-o-mahrūmī-o-thakan

din-bhar ke baa’d ham yahī ghar le ke aa.e haiñ

ilzām-e-be-vafā.ī hameñ yuuñ na de ki ham

terī hī bazm se ye hunar le ke aa.e haiñ

yārān-e-kam-nigāh bhī kuchh aaj rū-ba-rū

farsūdagī-e-zauq-e-nazar le ke aa.e haiñ

bahlā sakoge ham ko na 'shādāb' hañs ke tum

ham dil meñ jhāñkne kī nazar le ke aa.e haiñ

jhuTi masarraton ka samar le ke aae hain

shahr-e-wafa se dida-e-tar le ke aae hain

kis se kahen ki kitne hasin KHwab chhin kar

wo muzda-e-tulu'-e-sahar le ke aae hain

jab bhi faraaz dar pe aai wafa ki baat

diwane apna kasa-e-sar le ke aae hain

ehsas-e-na-muradi-o-mahrumi-o-thakan

din-bhar ke ba’d hum yahi ghar le ke aae hain

ilzam-e-be-wafai hamein yun na de ki hum

teri hi bazm se ye hunar le ke aae hain

yaran-e-kam-nigah bhi kuchh aaj ru-ba-ru

farsudagi-e-zauq-e-nazar le ke aae hain

bahla sakoge hum ko na 'shadab' hans ke tum

hum dil mein jhankne ki nazar le ke aae hain