unki mahfil ka ye dastur naya dekha hai

un kī mahfil kā ye dastūr nayā dekhā hai

haiñ jo āsūda karam un pe sivā dekhā hai

Dūbne vaale pe kyā guzrī ye ma'alūm nahīñ

ek majma’-sā kināre pe lagā dekhā hai

kyā zarūrī hai ki har ḳhvāb kī tā'bīr bhī ho

jī to ḳhush hai ki phir ik ḳhvāb nayā dekhā hai

yuuñ lagā jaise ho ye bhī kisī muflis kā vajūd

ḳhushk patta jo kabhī uḌtā huā dekhā hai

jaane kyā baat thī un mehñdī rache hāthoñ meñ

maiñ ne nam aañkh ko ham-rañg hinā dekhā hai

tum ko 'shādāb' maiñ dīvāna kahūñ kis muñh se

maiñ ne farzānoñ ko dīvāna banā dekhā hai

un ki mahfil ka ye dastur naya dekha hai

hain jo aasuda karam un pe siwa dekha hai

Dubne wale pe kya guzri ye ma'alum nahin

ek majma’-sa kinare pe laga dekha hai

kya zaruri hai ki har KHwab ki ta'bir bhi ho

ji to KHush hai ki phir ek KHwab naya dekha hai

yun laga jaise ho ye bhi kisi muflis ka wajud

KHushk patta jo kabhi uDta hua dekha hai

jaane kya baat thi un mehndi rache hathon mein

main ne nam aankh ko ham-rang hina dekha hai

tum ko 'shadab' main diwana kahun kis munh se

main ne farzanon ko diwana bana dekha hai