ان کی محفل کا یہ دستور نیا دیکھا ہے

ان کی محفل کا یہ دستور نیا دیکھا ہے

ہیں جو آسودہ کرم ان پہ سوا دیکھا ہے

ڈوبنے والے پہ کیا گزری یہ معلوم نہیں

ایک مجمع سا کنارے پہ لگا دیکھا ہے

کیا ضروری ہے کہ ہر خواب کی تعبیر بھی ہو

جی تو خوش ہے کہ پھر اک خواب نیا دیکھا ہے

یوں لگا جیسے ہو یہ بھی کسی مفلس کا وجود

خشک پتہ جو کبھی اڑتا ہوا دیکھا ہے

جانے کیا بات تھی ان مہندی رچے ہاتھوں میں

میں نے نم آنکھ کو ہم رنگ حنا دیکھا ہے

تم کو شادابؔ میں دیوانہ کہوں کس منہ سے

میں نے فرزانوں کو دیوانہ بنا دیکھا ہے