kijiye kis se bayan-e-dard-e-dil

kījiye kis se bayān-e-dard-e-dil

kaun suntā hai fuġhān-e-dard-e-dil

jazba-e-dil se ho pur jis kā zamīr

vo samajhtā hai zabān-e-dard-e-dil

apnī hastī ko miTānā hai baqā

miT nahīñ saktā nishān-e-dard-e-dil

zindagī miltī hai un ko ġhaib se

sab haiñ zinda kushtagān-e-dard-e-dil

mauj meñ aa ab to ai bahr-e-karam

muntazir haiñ tishnigān-e-dard-e-dil

un kī ulfat hai madār-e-zindagī

hai yahī rūh-e-ravān dard-e-dil

bijliyāñ us par girī haiñ husn kī

jal gayā yuuñ āshiyān-e-dard-e-dil

koī jā kar un se kah de hāl-e-zār

hai taḌaptā nīm-e-jān-e-dard-e-dil

mayyat-e-āshiq hai tanhā be-kafan

hai mohabbat nauha ḳhvān dard dil

jazba-e-dil kī kashish kā ye asar

vo bhī haiñ ab ham-zabān-e-dard-e-dil

ġham meñ tere mubtalā 'irshād' hai

kyā kahe rāz-e-nihān-e-dard-e-dil

kijiye kis se bayan-e-dard-e-dil

kaun sunta hai fughan-e-dard-e-dil

jazba-e-dil se ho pur jis ka zamir

wo samajhta hai zaban-e-dard-e-dil

apni hasti ko miTana hai baqa

miT nahin sakta nishan-e-dard-e-dil

zindagi milti hai un ko ghaib se

sab hain zinda kushtagan-e-dard-e-dil

mauj mein aa ab to ai bahr-e-karam

muntazir hain tishnigan-e-dard-e-dil

un ki ulfat hai madar-e-zindagi

hai yahi ruh-e-rawan dard-e-dil

bijliyan us par giri hain husn ki

jal gaya yun aashiyan-e-dard-e-dil

koi ja kar un se kah de haal-e-zar

hai taDapta nim-e-jaan-e-dard-e-dil

mayyat-e-ashiq hai tanha be-kafan

hai mohabbat nauha KHwan dard dil

jazba-e-dil ki kashish ka ye asar

wo bhi hain ab ham-zaban-e-dard-e-dil

gham mein tere mubtala 'irshad' hai

kya kahe raaz-e-nihan-e-dard-e-dil