کیجیے کس سے بیان درد دل

کیجیے کس سے بیان درد دل

کون سنتا ہے فغان درد دل

جذبۂ دل سے ہو پر جس کا ضمیر

وہ سمجھتا ہے زبان درد دل

اپنی ہستی کو مٹانا ہے بقا

مٹ نہیں سکتا نشان درد دل

زندگی ملتی ہے ان کو غیب سے

سب ہیں زندہ کشتگان درد دل

موج میں آ اب تو اے بحر کرم

منتظر ہیں تشنگان درد دل

ان کی الفت ہے مدار زندگی

ہے یہی روح روان درد دل

بجلیاں اس پر گری ہیں حسن کی

جل گیا یوں آشیاں درد دل

کوئی جا کر ان سے کہہ دے حال زار

ہے تڑپتا نیم جان درد دل

میت عاشق ہے تنہا بے کفن

ہے محبت نوحہ خوان درد دل

جذبۂ دل کی کشش کا یہ اثر

وہ بھی ہیں اب ہم زبان درد دل

غم میں تیرے مبتلا ارشادؔ ہے

کیا کہے راز نہان درد دل