dil waqf-e-sitam waqf-e-jafa dekh rahe hain

dil vaqf-e-sitam vaqf-e-jafā dekh rahe haiñ

sāhil ke qarīñ mauj-e-fanā dekh rahe haiñ

maiñ bhī unheñ maa.il ba-jafā dekh rahā huuñ

vo bhī mujhe raazī ba-razā dekh rahe haiñ

hañste hue chehre pe hai ik nuur kā a.alam

āñkhoñ meñ mai-e-hosh-rubā dekh rahe haiñ

kyā mahv-e-taġhāful hai koī jān-e-tamannā

kyuuñ dard ka.ī din se sivā dekh rahe haiñ

sāġhar kī khanak hai kahīñ phūloñ kī mahak hai

maiḳhāne ko ham ḳhuld-numā dekh rahe haiñ

bahte hue ashkoñ meñ hai tasvīr-e-rukH-e-dost

ā.īna-e-me.arāj-e-vafā dekh rahe haiñ

aaheñ haiñ agar lab to āñkhoñ meñ haiñ aañsū

ye apnī mohabbat kā silā dekh rahe haiñ

dil waqf-e-sitam waqf-e-jafa dekh rahe hain

sahil ke qarin mauj-e-fana dekh rahe hain

main bhi unhen mail ba-jafa dekh raha hun

wo bhi mujhe raazi ba-raza dekh rahe hain

hanste hue chehre pe hai ek nur ka aalam

aankhon mein mai-e-hosh-ruba dekh rahe hain

kya mahw-e-taghaful hai koi jaan-e-tamanna

kyun dard kai din se siwa dekh rahe hain

saghar ki khanak hai kahin phulon ki mahak hai

maiKHane ko hum KHuld-numa dekh rahe hain

bahte hue ashkon mein hai taswir-e-rukH-e-dost

aaina-e-mearaj-e-wafa dekh rahe hain

aahen hain agar lab to aankhon mein hain aansu

ye apni mohabbat ka sila dekh rahe hain