meri aankhon ko mayassar jab se binai hui

merī āñkhoñ ko mayassar jab se bīnā.ī huī

ik tamāshā-e-do-ā'lam kī tamāshā.ī huī

hosh vārafta huā ruḳhsat-e-shakebā.ī huī

terā jalva dekh kar ye hairat-e-afzā.ī huī

kis kī sūrat meñ nahīñ jalva tumhārā āshkār

vaah ye achchhī tumhārī shān-e-yaktā.ī huī

mā-sivā tere binā ai jān-e-jāñ kis ke liye

gulshan-e-ījād meñ ye bazm-e-ārā.ī huī

iztirāb-e-dil mirā had se tajāvuz kar gayā

is liye saare jahāñ meñ apnī rusvā.ī huī

dekhne vāloñ se pūchho tum ko us kī kyā ḳhabar

kar rahī hai kyā tumhārī aañkh sharmā.ī huī

ai nasīm-e-sub.h sach kahnā ye kis kī chaal hai

ātish-e-gul hai chaman meñ kis kī bhaḌkā.ī huī

ġhair ke sar kī qasam khaao to mānoñ e'tibār

apne sar kī to qasam sau baar hai khaa.ī huī

dīdanī thā ai 'jamīl' us shoḳh kā tarz-e-ḳhirām

fitna-e-mahshr adā thī chaal iThlā.ī huī

meri aankhon ko mayassar jab se binai hui

ek tamasha-e-do-a'lam ki tamashai hui

hosh warafta hua ruKHsat-e-shakebai hui

tera jalwa dekh kar ye hairat-e-afzai hui

kis ki surat mein nahin jalwa tumhaara aashkar

wah ye achchhi tumhaari shan-e-yaktai hui

ma-siwa tere bina ai jaan-e-jaan kis ke liye

gulshan-e-ijad mein ye bazm-e-arai hui

iztirab-e-dil mera had se tajawuz kar gaya

is liye sare jahan mein apni ruswai hui

dekhne walon se puchho tum ko us ki kya KHabar

kar rahi hai kya tumhaari aankh sharmai hui

ai nasim-e-subh sach kahna ye kis ki chaal hai

aatish-e-gul hai chaman mein kis ki bhaDkai hui

ghair ke sar ki qasam khao to manon e'tibar

apne sar ki to qasam sau bar hai khai hui

didani tha ai 'jamil' us shoKH ka tarz-e-KHiram

fitna-e-mahshr ada thi chaal iThlai hui