tera jam jam-e-hayat hai tera zikr zikr-e-dawam hai

terā jaam jām-e-hayāt hai terā zikr zikr-e-davām hai

jo samajh gayā tujhe sāqiyā use sidq-e-dil se salām hai

na Talūñgā sāqiyā jaam se yahī merī ’arz-e-tamām hai

maiñ talāsh-e-rāz meñ huuñ mujhe to terī nigāh se kaam hai

vo ḳhayāl meñ hue rū-ba-rū kyā pesh dil to vo kah ga.e

vahī dil yahāñ pe qubūl hai jo asīr-e-'ishq-e-imām hai

koī pī ke raah se bhaTak gayā koī pī ke raah ko pā gayā

jo sabhī kā zarf 'ayāñ kare ye terī sharāb kā kaam hai

merā riñd nau ko payām hai ki gurez-e-shaiḳh-e-haram kareñ

ye harām hai vo harām hai ye to un kā takiya-kalām hai

tera jam jam-e-hayat hai tera zikr zikr-e-dawam hai

jo samajh gaya tujhe saqiya use sidq-e-dil se salam hai

na Talunga saqiya jam se yahi meri ’arz-e-tamam hai

main talash-e-raaz mein hun mujhe to teri nigah se kaam hai

wo KHayal mein hue ru-ba-ru kya pesh dil to wo kah gae

wahi dil yahan pe qubul hai jo asir-e-'ishq-e-imam hai

koi pi ke rah se bhaTak gaya koi pi ke rah ko pa gaya

jo sabhi ka zarf 'ayan kare ye teri sharab ka kaam hai

mera rind nau ko payam hai ki gurez-e-shaiKH-e-haram karen

ye haram hai wo haram hai ye to un ka takiya-kalam hai