in dinon kar-e-digar karata hun

in dinoñ kār-e-digar karatā huuñ

vādī-e-hū kā safar karatā huuñ

jab kahīñ miltī nahīñ jā-e-panāh

kū-e-ehsās ko ghar karatā huuñ

din guzartā hai gulistānoñ meñ

raat sahrā meñ basar karatā huuñ

kisī lamhe ko farāmosh karūñ

kisī lamhe ko amar karatā huuñ

dekhnā chāhūñ maiñ jab ā.īna

us ke chehre pe nazar karatā huuñ

be-ḳhayālī meñ tire bheje ḳhutūt

roz idhar aur udhar karatā huuñ

tere kūche ke manāzir dekheñ

chāñd tāroñ ko ḳhabar karatā huuñ

naam hai harf-e-mohabbat merā

maiñ har ik dil pe asar karatā huuñ

ek ghar roz banātā huuñ 'mujīb'

ek ghar roz khañDar karatā huuñ

in dinon kar-e-digar karata hun

wadi-e-hu ka safar karata hun

jab kahin milti nahin ja-e-panah

ku-e-ehsas ko ghar karata hun

din guzarta hai gulistanon mein

raat sahra mein basar karata hun

kisi lamhe ko faramosh karun

kisi lamhe ko amar karata hun

dekhna chahun main jab aaina

us ke chehre pe nazar karata hun

be-KHayali mein tere bheje KHutut

roz idhar aur udhar karata hun

tere kuche ke manazir dekhen

chand taron ko KHabar karata hun

nam hai harf-e-mohabbat mera

main har ek dil pe asar karata hun

ek ghar roz banata hun 'mujib'

ek ghar roz khanDar karata hun