na zamin rok pai na ruka hun aasman se

na zamīn rok paa.ī na rukā huuñ āsmāñ se

tirī justujū meñ guzrā maiñ hudūd-e-lā-makāñ se

hai abas talāsh us kī hai fuzūl ye bhaTaknā

vo qarīb-tar hai dil se vo qarīb-tar hai jaañ se

kiyā baḌh ke ḳhair-maqdam use sar pe bhī biThāyā

jo nasīm-e-sub.h aa.ī tire sehn-e-gulistāñ se

koī tīr-e-tanz pheñke ki malāmatoñ ke patthar

na haTegā dil hamārā kabhī tere āstāñ se

idhar aao mujh se pūchho ki tumheñ batā.ūñgā sab

abhī ho ke aa rahā huuñ maiñ jahān-e-kahkashāñ se

usī dasht-e-imtihāñ meñ ka.ī baar Dagmagāyā

ka.ī baar gul chune haiñ usī dasht-e-imtihāñ se

huuñ uisī liye muqayyad maiñ badan kī sarhadoñ meñ

kahīñ phuñk na jaa.e a.alam mirī sozish-e-nihāñ se

vahī ek jaise manzar vahī sub.h-o-shām paiham

mujhe hoga.ī hai vahshat gul-o-barg-o-bāġhbāñ se

lahū dil ko jab kiyā hai to 'mujīb' kuchh kahā hai

mere sher kyā haiñ pūchho kisī sāhab-e-bayāñ se

na zamin rok pai na ruka hun aasman se

teri justuju mein guzra main hudud-e-la-makan se

hai abas talash us ki hai fuzul ye bhaTakna

wo qarib-tar hai dil se wo qarib-tar hai jaan se

kiya baDh ke KHair-maqdam use sar pe bhi biThaya

jo nasim-e-subh aai tere sehn-e-gulistan se

koi tir-e-tanz phenke ki malamaton ke patthar

na haTega dil hamara kabhi tere aastan se

idhar aao mujh se puchho ki tumhein bataunga sab

abhi ho ke aa raha hun main jahan-e-kahkashan se

usi dasht-e-imtihan mein kai bar Dagmagaya

kai bar gul chune hain usi dasht-e-imtihan se

hun uisi liye muqayyad main badan ki sarhadon mein

kahin phunk na jae aalam meri sozish-e-nihan se

wahi ek jaise manzar wahi subh-o-sham paiham

mujhe hogai hai wahshat gul-o-barg-o-baghban se

lahu dil ko jab kiya hai to 'mujib' kuchh kaha hai

mere sher kya hain puchho kisi sahab-e-bayan se