mujhko duniya ke har ek gham se chhuDa rakkha hai

mujh ko duniyā ke har ik ġham se chhuḌā rakkhā hai

jalva-e-yār ne mad.hosh banā rakkhā hai

maut se aap kī ulfat ne bachā rakkhā hai

varna bīmār-e-ġham-e-hijr meñ kyā rakkhā hai

arsa-e-hashr meñ rusvā.ī yaqīnī thī magar

terī rahmat ne har ik jurm chhupā rakkhā hai

manzil-e-dair-o-haram chhoḌ ke ai jān-e-jahāñ

maiñ ne kā’ba terī chaukhaT ko banā rakkhā hai

jazba-e-ishq meñ takmīl-e-ibādat ke liye

maiñ ne sar yaar ke qadmoñ meñ jhukā rakkhā hai

tere jalvoñ kī ye shoḳhī are tauba tauba

hosh muusā kā sar-e-tūr uThā rakkhā hai

mujh ko duniya ke har ek gham se chhuDa rakkha hai

jalwa-e-yar ne madhosh bana rakkha hai

maut se aap ki ulfat ne bacha rakkha hai

warna bimar-e-gham-e-hijr mein kya rakkha hai

arsa-e-hashr mein ruswai yaqini thi magar

teri rahmat ne har ek jurm chhupa rakkha hai

manzil-e-dair-o-haram chhoD ke ai jaan-e-jahan

main ne ka’ba teri chaukhaT ko bana rakkha hai

jazba-e-ishq mein takmil-e-ibaadat ke liye

main ne sar yar ke qadmon mein jhuka rakkha hai

tere jalwon ki ye shoKHi are tauba tauba

hosh musa ka sar-e-tur uTha rakkha hai