mujhe to mara haya ne teri karega mujhse hijab kab tak

mujhe to maarā hayā ne terī karegā mujh se hijāb kab tak

dikhā de mukhḌā uThā de parda rakhegā muñh par naqāb kab tak

bhalā ye pūchhe koī sanam se huī hai taqsīr kaun ham se

jo baaz aatā nahīñ sitam se ye zulm-o-jaur-o-'itāb kab tak

mire harīfoñ se kar ke yaarī huā sharīk-e-sharāb-ḳhvārī

bhalā maiñ kaise karūñ na zaarī jalūñ maiñ misl-e-kabāb kab tak

umañg par hai tirī javānī to kar le bande se lan-tarānī

ye baat achchhī nahīñ hai jaanī rahegā husn-o-shabāb kab tak

rahe hai ġhairoñ ke ghar meñ din-bhar na rashk yāroñ ko aa.e kyuuñ kar

kabhī vo aatā nahīñ mire ghar rahūñ maiñ ġham meñ ḳharāb kab tak

dilā sarāpā surūr ho jā nikal ke zulmat se nuur ho jā

ḳhudā ke nashsha meñ chuur ho jā rahegā mast-e-sharāb kab tak

mujhe to aa.ī hai dil par riqqat ki 'ishq-bāzī hai us kī ḳhilqat

to dām-e-sūrat meñ fil-haqīqat phañsā rahegā 'turāb' kab tak

mujhe to mara haya ne teri karega mujh se hijab kab tak

dikha de mukhDa uTha de parda rakhega munh par naqab kab tak

bhala ye puchhe koi sanam se hui hai taqsir kaun hum se

jo baz aata nahin sitam se ye zulm-o-jaur-o-'itab kab tak

mere harifon se kar ke yari hua sharik-e-sharab-KHwari

bhala main kaise karun na zari jalun main misl-e-kabab kab tak

umang par hai teri jawani to kar le bande se lan-tarani

ye baat achchhi nahin hai jaani rahega husn-o-shabab kab tak

rahe hai ghairon ke ghar mein din-bhar na rashk yaron ko aae kyun kar

kabhi wo aata nahin mere ghar rahun main gham mein KHarab kab tak

dila sarapa surur ho ja nikal ke zulmat se nur ho ja

KHuda ke nashsha mein chur ho ja rahega mast-e-sharab kab tak

mujhe to aai hai dil par riqqat ki 'ishq-bazi hai us ki KHilqat

to dam-e-surat mein fil-haqiqat phansa rahega 'turab' kab tak