مجھے تو مارا حیا نے تیری کرے گا مجھ سے حجاب کب تک

مجھے تو مارا حیا نے تیری کرے گا مجھ سے حجاب کب تک

دکھا دے مکھڑا اٹھا دے پردہ رکھے گا منہ پر نقاب کب تک

بھلا یہ پوچھے کوئی صنم سے ہوئی ہے تقصیر کون ہم سے

جو باز آتا نہیں ستم سے یہ ظلم و جور و عتاب کب تک

مرے حریفوں سے کر کے یاری ہوا شریک شراب خواری

بھلا میں کیسے کروں نہ زاری جلوں میں مثل کباب کب تک

امنگ پر ہے تری جوانی تو کر لے بندے سے لن ترانی

یہ بات اچھی نہیں ہے جانی رہے گا حسن و شباب کب تک

رہے ہے غیروں کے گھر میں دن بھر نہ رشک یاروں کو آئے کیوں کر

کبھی وہ آتا نہیں مرے گھر رہوں میں غم میں خراب کب تک

دلا سراپا سرور ہو جا نکل کے ظلمت سے نور ہو جا

خدا کے نشہ میں چور ہو جا رہے گا مست شراب کب تک

مجھے تو آئی ہے دل پر رقت کہ عشق بازی ہے اس کی خلقت

تو دام صورت میں فی الحقیقت پھنسا رہے گا ترابؔ کب تک