sajda karte the jahan wo sajda-gahen chhoD din

sajda karte the jahāñ vo sajda-gāheñ chhoḌ diiñ

tere pīchhe chal paḌe to apnī rāheñ chhoḌ diiñ

kis kī ḳhātir ġham sahe aur ho ga.e ḳhalvat-nashīñ

kis kī ḳhātir us zamāne kī panāheñ chhoḌ diiñ

husn kī ra.anā.iyoñ par ishq kī nādāniyāñ

jo ki dastūr-e-mohabbat meñ ravā haiñ chhoḌ diiñ

tum ne to rasm-e-jahāñ ke aage sar ḳham kar liyā

goyā tum ne Daal kar bāhoñ meñ bāheñ chhoḌ diiñ

rah gayā kyā hai manāne ke liye ab aap ko

aap mujh se jin adāoñ par ḳhafā haiñ chhoḌ deñ

jab se tere naqsh-e-pā par hai ravāñ 'mumtāz' phir

jin kī rāheñ terī rāhoñ se judā haiñ chhoḌ diiñ

sajda karte the jahan wo sajda-gahen chhoD din

tere pichhe chal paDe to apni rahen chhoD din

kis ki KHatir gham sahe aur ho gae KHalwat-nashin

kis ki KHatir us zamane ki panahen chhoD din

husn ki ranaiyon par ishq ki nadaniyan

jo ki dastur-e-mohabbat mein rawa hain chhoD din

tum ne to rasm-e-jahan ke aage sar KHam kar liya

goya tum ne Dal kar bahon mein bahen chhoD din

rah gaya kya hai manane ke liye ab aap ko

aap mujh se jin adaon par KHafa hain chhoD den

jab se tere naqsh-e-pa par hai rawan 'mumtaz' phir

jin ki rahen teri rahon se juda hain chhoD din