سجدہ کرتے تھے جہاں وہ سجدہ گاہیں چھوڑ دیں

سجدہ کرتے تھے جہاں وہ سجدہ گاہیں چھوڑ دیں

تیرے پیچھے چل پڑے تو اپنی راہیں چھوڑ دیں

کس کی خاطر غم سہے اور ہو گئے خلوت نشیں

کس کی خاطر اس زمانے کی پناہیں چھوڑ دیں

حسن کی رعنائیوں پر عشق کی نادانیاں

جو کہ دستور محبت میں روا ہیں چھوڑ دیں

تم نے تو رسم جہاں کے آگے سر خم کر لیا

گویا تم نے ڈال کر باہوں میں باہیں چھوڑ دیں

رہ گیا کیا ہے منانے کے لئے اب آپ کو

آپ مجھ سے جن اداؤں پر خفا ہیں چھوڑ دیں

جب سے تیرے نقش پا پر ہے رواں ممتازؔ پھر

جن کی راہیں تیری راہوں سے جدا ہیں چھوڑ دیں