murshid ka ye qaul muKHtasar hai

murshid kā ye qaul muḳhtasar hai

dil jo bhī kahe vo mo'atabar hai

socho to ye sīm-o-zar haiñ ḳhākī

dekho to ye ḳhaak sīm-o-zar hai

girdāb-e-gunāh meñ phañse haiñ

dāmān-e-dil-o-nigāh-tar hai

chaḌhtī huī āb-jū-e-ġhaflat

kuchh din se bahut uruuj par hai

is dhuup meñ apnī shāḳh-e-ġham par

achchhā hai ki kuchh to barg-o-bar hai

be-kārī-e-āshiqāñ salāmat

ye be-hunarī bhī ik hunar hai

kuchh soch ke us se baat karnā

us ko to diloñ kī bhī ḳhabar hai

murshid ka ye qaul muKHtasar hai

dil jo bhi kahe wo mo'atabar hai

socho to ye sim-o-zar hain KHaki

dekho to ye KHak sim-o-zar hai

girdab-e-gunah mein phanse hain

daman-e-dil-o-nigah-tar hai

chaDhti hui aab-ju-e-ghaflat

kuchh din se bahut uruj par hai

is dhup mein apnī shaKH-e-gham par

achchha hai ki kuchh to barg-o-bar hai

be-kari-e-ashiqan salamat

ye be-hunari bhi ek hunar hai

kuchh soch ke us se baat karna

us ko to dilon ki bhi KHabar hai