go jurm zamana mein hai izhaar-e-mohabbat

go jurm zamāna meñ hai iz.hār-e-mohabbat

hotā hai magar aaj bhī iqrār-e-mohabbat

be-tābī-e-dil kartī hai iz.hār-e-mohabbat

chehre se ayaañ haiñ mire āsār-e-mohabbat

a.alam hai ye ab kash-makash dil ke sabab se

inkār-e-mohabbat hai na iqrār-e-mohabbat

tā hashr na ab hogā sakūñ qalb ko mere

haa.il hai mirī raah meñ dīvār-e-mohabbat

pur-kaif hai is darja tirā bāda-e-ulfat

sarmast rahā karatā hai sarshār-e-mohabbat

hālat hai 'asīr' aap kī kyuuñ itnī digar-gūñ

kyā aap ko bhī ho gayā āzār-e-mohabbat

go jurm zamana mein hai izhaar-e-mohabbat

hota hai magar aaj bhi iqrar-e-mohabbat

be-tabi-e-dil karti hai izhaar-e-mohabbat

chehre se ayan hain mere aasar-e-mohabbat

aalam hai ye ab kash-makash dil ke sabab se

inkar-e-mohabbat hai na iqrar-e-mohabbat

ta hashr na ab hoga sakun qalb ko mere

hail hai meri rah mein diwar-e-mohabbat

pur-kaif hai is darja tera baada-e-ulfat

sarmast raha karata hai sarshaar-e-mohabbat

haalat hai 'asir' aap ki kyun itni digar-gun

kya aap ko bhi ho gaya aazar-e-mohabbat