گو جرم زمانہ میں ہے اظہار محبت

گو جرم زمانہ میں ہے اظہار محبت

ہوتا ہے مگر آج بھی اقرار محبت

بے تابی دل کرتی ہے اظہار محبت

چہرے سے عیاں ہیں مرے آثار محبت

عالم ہے یہ اب کش مکش دل کے سبب سے

انکار محبت ہے نہ اقرار محبت

تا حشر نہ اب ہوگا سکوں قلب کو میرے

حائل ہے مری راہ میں دیوار محبت

پر کیف ہے اس درجہ ترا بادۂ الفت

سرمست رہا کرتا ہے سرشار محبت

حالت ہے اسیرؔ آپ کی کیوں اتنی دگر گوں

کیا آپ کو بھی ہو گیا آزار محبت