shab-e-furqat hai main hun aur meri chashm-e-giryan hai

shab-e-furqat hai maiñ huuñ aur merī chashm-e-giryāñ hai

talātum-ḳhez ġham meñ josh-e-pur-ashkoñ kā tūfāñ hai

kahīñ be-tābī-e-dil rāz-e-ulfat kar na de afshāñ

madad ai zabt-e-girya josh-e-pur-ashkoñ kā tūfāñ hai

junūñ afzā havāoñ se fazā bhī uljhī uljhī hai

nazar meñ sūrat-e-mauhūm har tār-e-garebāñ hai

udāsī hai chaman par chup haiñ kaliyāñ gul haiñ pazhmurda

muḳhālif hai havā badlā huā rañg-e-gulistāñ hai

qarīb-e-ātish-e-gul hai chaman meñ āshiyāñ merā

sitam ye hai ki us par bhī nigāh-e-barq-e-sozāñ hai

ba-vaqt-e-naza.a bālīñ par 'asīr' is tarah vo aa.e

banī hai ġham kī sūrat chashm-e-tar hai dil pashemāñ hai

shab-e-furqat hai main hun aur meri chashm-e-giryan hai

talatum-KHez gham mein josh-e-pur-ashkon ka tufan hai

kahin be-tabi-e-dil raaz-e-ulfat kar na de afshan

madad ai zabt-e-girya josh-e-pur-ashkon ka tufan hai

junun afza hawaon se faza bhi uljhi uljhi hai

nazar mein surat-e-mauhum har tar-e-gareban hai

udasi hai chaman par chup hain kaliyan gul hain pazhmurda

muKHalif hai hawa badla hua rang-e-gulistan hai

qarib-e-atish-e-gul hai chaman mein aashiyan mera

sitam ye hai ki us par bhi nigah-e-barq-e-sozan hai

ba-waqt-e-naza baalin par 'asir' is tarah wo aae

bani hai gham ki surat chashm-e-tar hai dil pasheman hai