yarab kisi se chhin ke mujhko KHushi na de

yārab kisī se chhīn ke mujh ko ḳhushī na de

jo dūsroñ pe baar ho vo zindagī na de

nā-qābil-e-ubūr nazar tīrgī na de

yā phir mirī nigāh meñ bhī raushnī na de

majbūriyāñ baḌhā na asīr-e-hayāt kī

pābandiyoñ ke saath ġham-e-zindagī na de

dam-bhar kī baat hai ye ġham-e-zindagī agar

mahshar ke din gunāhoñ kī sharmindagī na de

vo rañj kyā jo ham ko batā.e na rañg-e-dahr

vo dard kyā jo ek na.ī zindagī na de

dard-e-dil hazīñ ba-qazā-e-ranj-o-ġham

uThe agar to mohlat-e-chārā-garī na de

vo ishq kyā jo ranj-o-musībat ke saath saath

ġhamgīn dil ko ne.amat-e-sanjīdgī na de

jis kā natīja ġham ke sivā aur kuchh na ho

ai nā-shanāsh-e-rañj mujhe vo ḳhushī na de

ma.alūm hotā haal agar is jahān kā

kahtā hazār baar mujhe zindagī na de

usrat mirī qabūl kare bhī to ai ḳhudā

māñge hue charāġh meñ tū raushnī na de

'bismil' vafūr-e-gam bhī rahe raaz hī agar

dast-e-junoñ ko zahmat-e-jāma-darī na de

yarab kisi se chhin ke mujh ko KHushi na de

jo dusron pe bar ho wo zindagi na de

na-qabil-e-ubur nazar tirgi na de

ya phir meri nigah mein bhi raushni na de

majburiyan baDha na asir-e-hayat ki

pabandiyon ke sath gham-e-zindagi na de

dam-bhar ki baat hai ye gham-e-zindagi agar

mahshar ke din gunahon ki sharmindagi na de

wo ranj kya jo hum ko batae na rang-e-dahr

wo dard kya jo ek nai zindagi na de

dard-e-dil hazin ba-qaza-e-ranj-o-gham

uThe agar to mohlat-e-chaara-gari na de

wo ishq kya jo ranj-o-musibat ke sath sath

ghamgin dil ko neamat-e-sanjidgi na de

jis ka natija gham ke siwa aur kuchh na ho

ai na-shanash-e-ranj mujhe wo KHushi na de

malum hota haal agar is jahan ka

kahta hazar bar mujhe zindagi na de

usrat meri qabul kare bhi to ai KHuda

mange hue charagh mein tu raushni na de

'bismil' wafur-e-gam bhi rahe raaz hi agar

dast-e-junon ko zahmat-e-jama-dari na de