dam-e-aKHir musibat kaT do bahar-e-KHuda meri

dam-e-āḳhir musībat kaaT do bahar-e-ḳhudā merī

tum aa kar dard ke parde meñ kar jaao davā merī

mohabbat but-kade meñ chal ke us kā faisla kar de

ḳhudā merā ḳhudā merā hai yā ye mūrat hai ḳhudā merī

yahāñ se jab ga.ī thī tab asar par ḳhaar khaa.e thī

vahāñ se phuul barsātī huī palTī duā merī

muqayyad ho ke lutf-e-hastī-e-āzād bhī khoyā

vo kyā thī ibtidā merī vo kyā thī intihā merī

miyān-e-hashr meñ ye kāfir bahut itrā.e phirte haiñ

mazā aa jaa.e aise meñ agar sun le ḳhudā merī

kisī kā jalva-e-rañgīñ ye kahtā hai inheñ puujo

ye us patthar ke but haiñ jis pe pistī thī hinā merī

na jaane kaun se yūsuf kā jalva mujh meñ pinhāñ hai

zuleḳhā aaj tak kartī hai 'muztar' iltijā merī

dam-e-aKHir musibat kaT do bahar-e-KHuda meri

tum aa kar dard ke parde mein kar jao dawa meri

mohabbat but-kade mein chal ke us ka faisla kar de

KHuda mera KHuda mera hai ya ye murat hai KHuda meri

yahan se jab gai thi tab asar par KHar khae thi

wahan se phul barsati hui palTi dua meri

muqayyad ho ke lutf-e-hasti-e-azad bhi khoya

wo kya thi ibtida meri wo kya thi intiha meri

miyan-e-hashr mein ye kafir bahut itrae phirte hain

maza aa jae aise mein agar sun le KHuda meri

kisi ka jalwa-e-rangin ye kahta hai inhen pujo

ye us patthar ke but hain jis pe pisti thi hina meri

na jaane kaun se yusuf ka jalwa mujh mein pinhan hai

zuleKHa aaj tak karti hai 'muztar' iltija meri