masruf-e-shukr-e-neamat-e-pir-e-mughan rahun

masrūf-e-shukr-e-ne.amat-e-pīr-e-muġhāñ rahūñ

allāh mujh ko yuuñ hī pilā.e jahāñ rahūñ

zer-e-zamīñ rahūñ ki tah-e-āsmāñ rahūñ

ai justujū-e-yār batā maiñ kahāñ rahūñ

zālim ye bazm-e-husn kā achchhā rivāj hai

tū sham.a ho ke bhī na jale maiñ tapāñ rahūñ

shakloñ se rasm-e-rashk-e-raqābat fuzūl hai

hastī jab ek hī hai to kyuuñ bad-gumāñ rahūñ

ban jaa.eñ mirī tarz-e-vafā kī kahāniyāñ

aisā miTā ki sāhabt-e-nām-o-nishāñ rahūñ

āb-e-hayāt pī ke ḳhizr kyā yahāñ rahe

maiñ Thaan luuñ to kuchh na piyūñ aur yahāñ rahūñ

ai chashm-e-yār maut kā pahlū bachā ke tū

aisī nigāh Daal ki maiñ nīm-jāñ rahūñ

'muztar' vajūd-e-zāt ne ghar tak bhī le liyā

jab ḳhud vo har jagah hai to ab maiñ kahāñ rahūñ

masruf-e-shukr-e-neamat-e-pir-e-mughan rahun

allah mujh ko yun hi pilae jahan rahun

zer-e-zamin rahun ki tah-e-asman rahun

ai justuju-e-yar bata main kahan rahun

zalim ye bazm-e-husn ka achchha riwaj hai

tu shama ho ke bhi na jale main tapan rahun

shaklon se rasm-e-rashk-e-raqabat fuzul hai

hasti jab ek hi hai to kyun bad-guman rahun

ban jaen meri tarz-e-wafa ki kahaniyan

aisa miTa ki sahabt-e-nam-o-nishan rahun

aab-e-hayat pi ke KHizr kya yahan rahe

main Than lun to kuchh na piyun aur yahan rahun

ai chashm-e-yar maut ka pahlu bacha ke tu

aisi nigah Dal ki main nim-jaan rahun

'muztar' wajud-e-zat ne ghar tak bhi le liya

jab KHud wo har jagah hai to ab main kahan rahun