be-mange hue milte saghar ko yahin dekha

be-māñge hue milte sāġhar ko yahīñ dekhā

saaqī sā saḳhī daatā ham ne to nahīñ dekhā

ik naqsh kī hastī meñ sab zer-e-nagīñ dekhā

but-ḳhāna jahāñ paayā ka.aba bhī vahīñ dekhā

maiḳhāne se uThne kā ġham mujh ko nahīñ lekin

hasrat hai to itnī hai saaqī ko nahīñ dekhā

āñkheñ to hamesha se jalve kī shanāsā haiñ

ab aa ke yahāñ jaanā pahle to vahīñ dekhā

ḳhāk-e-dar-e-jānāna ham ne tere sadqe meñ

chāhat ke faqīroñ ko sandal ba-jabīñ dekhā

āñkhoñ kā faqat honā duniyā meñ nahīñ kaafī

nargis kī bhī āñkheñ thiiñ aur kuchh bhī nahīñ dekhā

ai ruuh tah-e-madfan tū jā ke phir aa.ī hai

itnā to batātī jā us ko bhī kahīñ dekhā

āh-e-dil-e-muztar ne kuchh aisī havā bāñdhī

be-parda tujhe ham ne o parda-nashīñ dekhā

be-mange hue milte saghar ko yahin dekha

saqi sa saKHi data hum ne to nahin dekha

ek naqsh ki hasti mein sab zer-e-nagin dekha

but-KHana jahan paya kaba bhi wahin dekha

maiKHane se uThne ka gham mujh ko nahin lekin

hasrat hai to itni hai saqi ko nahin dekha

aankhen to hamesha se jalwe ki shanasa hain

ab aa ke yahan jaana pahle to wahin dekha

KHak-e-dar-e-jaanana hum ne tere sadqe mein

chahat ke faqiron ko sandal ba-jabin dekha

aankhon ka faqat hona duniya mein nahin kafi

nargis ki bhi aankhen thin aur kuchh bhi nahin dekha

ai ruh tah-e-madfan tu ja ke phir aai hai

itna to batati ja us ko bhi kahin dekha

aah-e-dil-e-muztar ne kuchh aisi hawa bandhi

be-parda tujhe hum ne o parda-nashin dekha