dard minnat-kash-e-darman-e-masiha na hua

dard minnat-kash-e-darmān-e-masīhā na huā

terā ehsān hai yārab ki maiñ achchhā na huā

merī miTTī bhī mohabbat kī havā meñ uḌ jaaye

tab maiñ samjhūñgā ki ḳhāk-e-dar-e-jānāna huā

mai-kada duur hai maiñ zaar huuñ saaqī hai ḳhafā

haaye kis vaqt meñ ḳhālī mirā paimāna huā

tere bīmār kī shorīda-sarī miT na sakī

sar paTaktī rahī duniyā magar achchhā na huā

na ḳhud aayā na shab-e-hijr qazā ko bhejā

bevafā ek bhī va.ada tirā puurā na huā

haaye gulzār-e-tamannā kī tabāhī 'muztar'

phuul to phuul koī ḳhaar bhī paidā na huā

dard minnat-kash-e-darman-e-masiha na hua

tera ehsan hai yarab ki main achchha na hua

meri miTTi bhi mohabbat ki hawa mein uD jaye

tab main samjhunga ki KHak-e-dar-e-jaanana hua

mai-kada dur hai main zar hun saqi hai KHafa

haye kis waqt mein KHali mera paimana hua

tere bimar ki shorida-sari miT na saki

sar paTakti rahi duniya magar achchha na hua

na KHud aaya na shab-e-hijr qaza ko bheja

bewafa ek bhi wada tera pura na hua

haye gulzar-e-tamanna ki tabahi 'muztar'

phul to phul koi KHar bhi paida na hua