درد منت کش درمان مسیحا نہ ہوا

درد منت کش درمان مسیحا نہ ہوا

تیرا احسان ہے یا رب کہ میں اچھا نہ ہوا

میری مٹی بھی محبت کی ہوا میں اڑ جائے

تب میں سمجھوں گا کہ خاک در جانانہ ہوا

مے کدہ دور ہے میں زار ہوں ساقی ہے خفا

ہائے کس وقت میں خالی مرا پیمانہ ہوا

تیرے بیمار کی شوریدہ سری مٹ نہ سکی

سر پٹکتی رہی دنیا مگر اچھا نہ ہوا

نہ خود آیا نہ شب ہجر قضا کو بھیجا

بے وفا ایک بھی وعدہ ترا پورا نہ ہوا

ہائے گل زار تمنا کی تباہی مضطرؔ

پھول تو پھول کوئی خار بھی پیدا نہ ہوا