junun ke josh mein insan ruswa ho hi jata hai

junūñ ke josh meñ insāñ rusvā ho hī jaatā hai

garebāñ phāḌne se faash pardā ho hī jaatā hai

mohabbat ḳhauf-e-rusvā.ī kā baa.is ban hī jaatī hai

tarīq-e-ishq meñ apnoñ se pardā ho hī jaatā hai

javānī vasl kī lazzat pe rāġhib kar hī detī hai

tumheñ is baat kā ġham kyuuñ ne aisā ho hī jaatā hai

bigaḌte kyuuñ ho aapas meñ shikāyat kar hī lete haiñ

adū kā tazkira dushman kā charchā ho hī jaatā hai

tumhārī nargis-e-bīmār achchhā kar hī detī hai

jise tum dekh lete ho vo achchhā ho hī jaatā hai

akelā pā ke un ko arz-e-matlab kar hī letā huuñ

na chāhūñ to bhī iz.hār-e-tamannā ho hī jaatā hai

mirā dāvā-e-ishq aġhyār-e-bātil kar hī dete haiñ

jise jhūTā banā leñ chaar jhūTā ho hī jaatā hai

butān-e-be-vafā 'muztar' dil-o-dīñ le hī lete haiñ

tumhīñ par kuchh nahīñ mauqūf aisā ho hī jaatā hai

junun ke josh mein insan ruswa ho hi jata hai

gareban phaDne se fash parda ho hi jata hai

mohabbat KHauf-e-ruswai ka bais ban hi jati hai

tariq-e-ishq mein apnon se parda ho hi jata hai

jawani wasl ki lazzat pe raghib kar hi deti hai

tumhein is baat ka gham kyun ne aisa ho hi jata hai

bigaDte kyun ho aapas mein shikayat kar hi lete hain

adu ka tazkira dushman ka charcha ho hi jata hai

tumhaari nargis-e-bimar achchha kar hi deti hai

jise tum dekh lete ho wo achchha ho hi jata hai

akela pa ke un ko arz-e-matlab kar hi leta hun

na chahun to bhi izhaar-e-tamanna ho hi jata hai

mera dawa-e-ishq aghyar-e-baatil kar hi dete hain

jise jhuTa bana len chaar jhuTa ho hi jata hai

butan-e-be-wafa 'muztar' dil-o-din le hi lete hain

tumhin par kuchh nahin mauquf aisa ho hi jata hai