na kisi ki aankh ka nur hun na kisi ke dil ka qarar hun

na kisī kī aañkh kā nuur huuñ na kisī ke dil kā qarār huuñ

kisī kaam meñ jo na aa sakī maiñ vo ek musht-e-ġhubār huuñ

na davā-e-dard-e-jigar huuñ maiñ na kisī kī mīThī nazar huuñ maiñ

na idhar huuñ maiñ na idhar huuñ maiñ na shakeb huuñ na qarār huuñ

mirā vaqt mujh se bichhaḌ gayā mirā rañg-rūp bigaḌ gayā

jo ḳhizāñ se baaġh ujaḌ gayā maiñ usī kī fasl-e-bahār huuñ

pai fātiha koī aa.e kyuuñ koī chaar phuul chaḌhā.e kyuuñ

koī sham.a lā ke jalā.e kyuuñ ki maiñ be-kasī kā mazār huuñ

na maiñ laag huuñ na lagāv huuñ na suhāg huuñ na subhāv huuñ

jo bigaḌ gayā vo banāv huuñ jo nahīñ rahā vo siñgār huuñ

maiñ nahīñ huuñ naġhma-e-jāñ-fizā mujhe aap sun ke kareñge kyā

maiñ baḌe birog kī huuñ sadā maiñ baḌe dukhī kī pukār huuñ

na maiñ 'muztar' un kā habīb huuñ na maiñ 'muztar' un kā raqīb huuñ

jo bigaḌ gayā vo nasīb huuñ jo ujaḌ gayā vo dayār huuñ

na kisi ki aankh ka nur hun na kisi ke dil ka qarar hun

kisi kaam mein jo na aa saki main wo ek musht-e-ghubar hun

na dawa-e-dard-e-jigar hun main na kisi ki miThi nazar hun main

na idhar hun main na idhar hun main na shakeb hun na qarar hun

mera waqt mujh se bichhaD gaya mera rang-rup bigaD gaya

jo KHizan se bagh ujaD gaya main usi ki fasl-e-bahaar hun

pai fatiha koi aae kyun koi chaar phul chaDhae kyun

koi shama la ke jalae kyun ki main be-kasi ka mazar hun

na main lag hun na lagaw hun na suhag hun na subhaw hun

jo bigaD gaya wo banaw hun jo nahin raha wo singar hun

main nahin hun naghma-e-jaan-fiza mujhe aap sun ke karenge kya

main baDe birog ki hun sada main baDe dukhi ki pukar hun

na main 'muztar' un ka habib hun na main 'muztar' un ka raqib hun

jo bigaD gaya wo nasib hun jo ujaD gaya wo dayar hun