doi ja ke rang-e-safa rah gaya

doī jā ke rañg-e-safā rah gayā

ḳhudī miTte miTte ḳhudā rah gayā

nazar phir na palTī unheñ dekh kar

in āñkhoñ kā parda uThā rah gayā

ta.alluq to us gul se chhoḌā magar

kaleje meñ kāñTā chubhā rah gayā

maiñ ik zikr thā jis kī shohrat huī

vo ik bhed thā jo chhupā rah gayā

miTe par bhī un kī tamannā rahī

ta.alluq lagī kā lagā rah gayā

fanā ho ke shikve tire miT gayā

faqat zindagī kī gilā rah gayā

ye but jab jahannum meñ Daale ga.e

to phir terī jannat meñ kyā rah gayā

hasīnoñ ne qismat meñ islāh dī

nasīboñ kā likkhā dharā rah gayā

vo nākām huuñ sar mirā teġh se

judā hote hote judā rah gayā

mohabbat kī rāhoñ se 'muztar' nikal

yahāñ phañs ke jo rah gayā rah gayā

doi ja ke rang-e-safa rah gaya

KHudi miTte miTte KHuda rah gaya

nazar phir na palTi unhen dekh kar

in aankhon ka parda uTha rah gaya

talluq to us gul se chhoDa magar

kaleje mein kanTa chubha rah gaya

main ek zikr tha jis ki shohrat hui

wo ek bhed tha jo chhupa rah gaya

miTe par bhi un ki tamanna rahi

talluq lagi ka laga rah gaya

fana ho ke shikwe tere miT gaya

faqat zindagi ki gila rah gaya

ye but jab jahannum mein Dale gae

to phir teri jannat mein kya rah gaya

hasinon ne qismat mein islah di

nasibon ka likkha dhara rah gaya

wo nakaam hun sar mera tegh se

juda hote hote juda rah gaya

mohabbat ki rahon se 'muztar' nikal

yahan phans ke jo rah gaya rah gaya