دوئی جا کے رنگ صفا رہ گیا

دوئی جا کے رنگ صفا رہ گیا

خودی مٹتے مٹتے خدا رہ گیا

نظر پھر نہ پلٹی انہیں دیکھ کر

ان آنکھوں کا پردہ اٹھا رہ گیا

تعلق تو اس گل سے چھوڑا مگر

کلیجے میں کانٹا چبھا رہ گیا

میں اک ذکر تھا جس کی شہرت ہوئی

وہ اک بھید تھا جو چھپا رہ گیا

مٹے پر بھی ان کی تمنا رہی

تعلق لگی کا لگا رہ گیا

فنا ہو کے شکوے ترے مٹ گیا

فقط زندگی کی گلا رہ گیا

یہ بت جب جہنم میں ڈالے گئے

تو پھر تیری جنت میں کیا رہ گیا

حسینوں نے قسمت میں اصلاح دی

نصیبوں کا لکھا دھرا رہ گیا

وہ ناکام ہوں سر مرا تیغ سے

جدا ہوتے ہوتے جدا رہ گیا

محبت کی راہوں سے مضطرؔ نکل

یہاں پھنس کے جو رہ گیا رہ گیا