wafadari ki surat mein jafa-kari ka naqsha tu

vafādārī kī sūrat meñ jafā-kārī kā naqshā tū

ye nairañg-e-mohabbat hai ki aisā maiñ huuñ vaisā tū

zamāna kaT gayā lekin vahī hālat hai donoñ kī

idhar jaise kā taisā maiñ udhar jaise kā taisā tū

jafā kar qahr kar jaur-o-sitam kar naaz bejā kar

magar ye soch rusvā kaun ho jā.egā maiñ yā tū

kise tāb-e-tajallī hai jo tujh ko barmalā dekhe

yahī parda bahut hai bas uThā de apnā pardā tū

mire dil ko bhī saaqī ārzū-e-bāda-noshī hai

ye sun sun kar ki ik kuuze meñ bhar detā hai dariyā tū

mohabbat rahnumā-e-shauq tujh se saikḌoñ sīkhe

maiñ kuchh un meñ nahīñ jin ko batā detī hai rastā tū

ḳhudā.ī tū ne paidā kī to tere kaam kyā aa.ī

akelā yuuñ bhī rahtā thā rahā yuuñ bhī akelā tū

qazā hañgām-e-āḳhir koī aatā hai ayādat ko

mire bālīñ se dam-bhar ke liye lillāh haT jā tū

mohabbat meñ sarāpā ārzū-dar-ārzū maiñ huuñ

tamannā dil mirā hai aur mire dil kī tamannā tū

vo aisā kaun thā jis ne kiyā badnām donoñ ko

diloñ kī baat yuuñ kah de na aisā maiñ na aisā tū

kamāl-e-nesthī se maiñ ne hastī kā patā paayā

pukārā maiñ ne apne-āp ko aur mujh meñ bolā tū

tire hī rañg-e-sūrat se ye sab naqshe chamakte haiñ

bigaḌ jā.eñgī sab shakleñ agar Dālegā pardā tū

bhalā ai ā.īne tū aur un kī shakl dekhegā

kahāñ chashm-e-tamāshā.ī kahāñ āñkhoñ kā andhā to

vo aisā tū ki tere saath maiñ badnām aalam meñ

vo aisā maiñ ki mere saath hai rusvā-e-duniyā tū

mirī hālat to jab badle ki aisā aur ko pā.ūñ

mirī āñkheñ to jab jāneñ dikhā de apnā jaisā tū

tujhī se naqsh-e-nākāmī meñ haiñ ummīd ke jalve

shab-e-ġham hai qazā ke bhes meñ merā masīhā tū

tire naqshe se har naqshā hai phir ye sharm kyā ma.anī

tirī sūrat se har sūrat hai kyuuñ kartā hai pardā tū

vajūd-e-zāt-e-vāhid hai to do-yaktā.iyāñ kaisī

idhar chāhat meñ yaktā maiñ udhar sūrat meñ yaktā tū

mirī chāhat tirī gāhak hai aur qīmat dil-e-'muztar'

tirā jalva mirā bāzār hai aur merā saudā tū

wafadari ki surat mein jafa-kari ka naqsha tu

ye nairang-e-mohabbat hai ki aisa main hun waisa tu

zamana kaT gaya lekin wahi haalat hai donon ki

idhar jaise ka taisa main udhar jaise ka taisa tu

jafa kar qahr kar jaur-o-sitam kar naz beja kar

magar ye soch ruswa kaun ho jaega main ya tu

kise tab-e-tajalli hai jo tujh ko barmala dekhe

yahi parda bahut hai bas uTha de apna parda tu

mere dil ko bhi saqi aarzu-e-baada-noshi hai

ye sun sun kar ki ek kuze mein bhar deta hai dariya tu

mohabbat rahnuma-e-shauq tujh se saikDon sikhe

main kuchh un mein nahin jin ko bata deti hai rasta tu

KHudai tu ne paida ki to tere kaam kya aai

akela yun bhi rahta tha raha yun bhi akela tu

qaza hangam-e-aKHir koi aata hai ayaadat ko

mere baalin se dam-bhar ke liye lillah haT ja tu

mohabbat mein sarapa aarzu-dar-arzu main hun

tamanna dil mera hai aur mere dil ki tamanna tu

wo aisa kaun tha jis ne kiya badnam donon ko

dilon ki baat yun kah de na aisa main na aisa tu

kamal-e-nesthi se main ne hasti ka pata paya

pukara main ne apne-ap ko aur mujh mein bola tu

tere hi rang-e-surat se ye sab naqshe chamakte hain

bigaD jaengi sab shaklen agar Dalega parda tu

bhala ai aaine tu aur un ki shakl dekhega

kahan chashm-e-tamashai kahan aankhon ka andha to

wo aisa tu ki tere sath main badnam aalam mein

wo aisa main ki mere sath hai ruswa-e-duniya tu

meri haalat to jab badle ki aisa aur ko paun

meri aankhen to jab jaanen dikha de apna jaisa tu

tujhi se naqsh-e-nakaami mein hain ummid ke jalwe

shab-e-gham hai qaza ke bhes mein mera masiha tu

tere naqshe se har naqsha hai phir ye sharm kya mani

teri surat se har surat hai kyun karta hai parda tu

wajud-e-zat-e-wahid hai to do-yaktaiyan kaisi

idhar chahat mein yakta main udhar surat mein yakta tu

meri chahat teri gahak hai aur qimat dil-e-'muztar'

tera jalwa mera bazar hai aur mera sauda tu