na jaane kaisi gaDi hui hai na jaane kaisi lagi hui hai

na jaane kaisī gaḌī huī hai na jaane kaisī lagī huī hai

vo terī chuTkī se bhī na niklī jo phāñs dil meñ chhabī huī hai

ilāhī jānoñ kī ḳhair karnā vo teġh-e-abrū khīñchī huī hai

kisī kī āñkhoñ kā sāmnā hai qazā kī khiḌkī khulī huī hai

tumhāre talvoñ ke aarzū meñ pisī huī hai ghulī huī hai

hinā kī sarsabz pattiyoñ meñ jo laal rañgat chhipī huī hai

bigāḌ qismat kā kyā batā.ūñ jo saath mere lagī huī hai

kahīñ kahīñ se kaTī huī hai kahīñ kahīñ se miTī huī hai

vo naujavānī kahāñ se aa.e jo daaġh de kar ga.ī huī hai

zamīñ pe kyuuñ kar use utārūñ jo dhuup koThe chaḌhī huī hai

hamāre ḳhūn-e-vafā kī rañgat nazar meñ nāhaq jamī huī hai

lahū meñ phir apne haath bharnā abhī to mehñdī rachī huī hai

vajūd-e-ātish to ab huā hai maiñ is ke pahle se jal rahā huuñ

mire kaleje ke dukh na pūchho lagī se pahle lagī huī hai

na jaane kaisi gaDi hui hai na jaane kaisi lagi hui hai

wo teri chuTki se bhi na nikli jo phans dil mein chhabi hui hai

ilahi jaanon ki KHair karna wo tegh-e-abru khinchi hui hai

kisi ki aankhon ka samna hai qaza ki khiDki khuli hui hai

tumhaare talwon ke aarzu mein pisi hui hai ghuli hui hai

hina ki sarsabz pattiyon mein jo lal rangat chhipi hui hai

bigaD qismat ka kya bataun jo sath mere lagi hui hai

kahin kahin se kaTi hui hai kahin kahin se miTi hui hai

wo naujawani kahan se aae jo dagh de kar gai hui hai

zamin pe kyun kar use utarun jo dhup koThe chaDhi hui hai

hamare KHun-e-wafa ki rangat nazar mein nahaq jami hui hai

lahu mein phir apne hath bharna abhi to mehndi rachi hui hai

wajud-e-atish to ab hua hai main is ke pahle se jal raha hun

mere kaleje ke dukh na puchho lagi se pahle lagi hui hai