dushmani achchhi hai lekin dosti achchhi nahin

dushmanī achchhī hai lekin dostī achchhī nahīñ

aag behtar hai magar dil kī lagī achchhī nahīñ

ye qayām-e-ārzī aur apne aapas kā firāq

tum kahīñ aur maiñ kahīñ ye zindagī achchhī nahīñ

girya-e-fasl-e-ḳhizāñ kā vaqt aa pahuñchā qarīb

ai gulo dekho ye be-mauqa.a hañsī achchhī nahīñ

aa.ine kā qā.eda hai sab ke aage ek ho

ham ġharīboñ se tumhārī kaj-ruḳhī achchhī nahīñ

chashma-e-haivāñ se ye kah kar sikandar aa gayā

jo vasīle se mile vo zindagī achchhī nahīñ

vo hamārā qissa-e-ġham sun ke 'muztar' kah uThe

koī is ko kyā kare taqdīr hī achchhī nahīñ

dushmani achchhi hai lekin dosti achchhi nahin

aag behtar hai magar dil ki lagi achchhi nahin

ye qayam-e-arzi aur apne aapas ka firaq

tum kahin aur main kahin ye zindagi achchhi nahin

girya-e-fasl-e-KHizan ka waqt aa pahuncha qarib

ai gulo dekho ye be-mauqa hansi achchhi nahin

aaine ka qaeda hai sab ke aage ek ho

hum gharibon se tumhaari kaj-ruKHi achchhi nahin

chashma-e-haiwan se ye kah kar sikandar aa gaya

jo wasile se mile wo zindagi achchhi nahin

wo hamara qissa-e-gham sun ke 'muztar' kah uThe

koi is ko kya kare taqdir hi achchhi nahin