دشمنی اچھی ہے لیکن دوستی اچھی نہیں

دشمنی اچھی ہے لیکن دوستی اچھی نہیں

آگ بہتر ہے مگر دل کی لگی اچھی نہیں

یہ قیام عارضی اور اپنے آپس کا فراق

تم کہیں اور میں کہیں یہ زندگی اچھی نہیں

گریۂ فصل خزاں کا وقت آ پہنچا قریب

اے گلو دیکھو یہ بے موقع ہنسی اچھی نہیں

آئنے کا قاعدہ ہے سب کے آگے ایک ہو

ہم غریبوں سے تمہاری کج رخی اچھی نہیں

چشمۂ حیواں سے یہ کہہ کر سکندر آ گیا

جو وسیلے سے ملے وہ زندگی اچھی نہیں

وہ ہمارا قصۂ غم سن کے مضطرؔ کہہ اٹھے

کوئی اس کو کیا کرے تقدیر ہی اچھی نہیں