KHuda ne wasl ki shab mujhko kis mushkil mein rakkha hai

ḳhudā ne vasl kī shab mujh ko kis mushkil meñ rakkhā hai

bahut kuchh kah chukā huuñ aur bahut kuchh dil meñ rakkhā hai

tarīq-e-ishq kī rāheñ janāb-e-ḳhizr kyā jāneñ

unhoñne kab qadam is maut kī manzil meñ rakkhā hai

ḳhudāvandā visāl-e-yār kī hasrat na puurī ho

ye vo hasrat hai jis ko maiñ ne barsoñ dil meñ rakhā hai

adū se bhī hai tum ko rabt aur mujh se bhī milte ho

mujhe kis dil meñ rakhoge use kis dil meñ rakhā hai

nigāheñ jā ke rū-e-yār tak kyā chiiz le aa.iiñ

jise dard-e-mohabbat kar ke mere dil meñ rakkhā hai

ḳhudā jaane mirī miTTī Thikāne kab lage 'muztar'

bahut din se janāza kūcha-e-qātil meñ rakkhā hai

KHuda ne wasl ki shab mujh ko kis mushkil mein rakkha hai

bahut kuchh kah chuka hun aur bahut kuchh dil mein rakkha hai

tariq-e-ishq ki rahen janab-e-KHizr kya jaanen

unhonne kab qadam is maut ki manzil mein rakkha hai

KHudawanda visal-e-yar ki hasrat na puri ho

ye wo hasrat hai jis ko main ne barson dil mein rakha hai

adu se bhi hai tum ko rabt aur mujh se bhi milte ho

mujhe kis dil mein rakhoge use kis dil mein rakha hai

nigahen ja ke ru-e-yar tak kya chiz le aain

jise dard-e-mohabbat kar ke mere dil mein rakkha hai

KHuda jaane meri miTTi Thikane kab lage 'muztar'

bahut din se janaza kucha-e-qatil mein rakkha hai