خدا نے وصل کی شب مجھ کو کس مشکل میں رکھا ہے

خدا نے وصل کی شب مجھ کو کس مشکل میں رکھا ہے

بہت کچھ کہہ چکا ہوں اور بہت کچھ دل میں رکھا ہے

طریق عشق کی راہیں جناب خضر کیا جانیں

انہوں نے کب قدم اس موت کی منزل میں رکھا ہے

خداوندا وصال یار کی حسرت نہ پوری ہو

یہ وہ حسرت ہے جس کو میں نے برسوں دل میں رکھا ہے

عدو سے بھی ہے تم کو ربط اور مجھ سے بھی ملتے ہو

مجھے کس دل میں رکھو گے اسے کس دل میں رکھا ہے

نگاہیں جا کے روئے یار تک کیا چیز لے آئیں

جسے درد محبت کر کے میرے دل میں رکھا ہے

خدا جانے مری مٹی ٹھکانے کب لگے مضطرؔ

بہت دن سے جنازہ کوچۂ قاتل میں رکھا ہے