ye nahaq inkisar-e-jalwa-e-hairat-faza kyun hai

ye nāhaq inkisār-e-jalva-e-hairat-fazā kyuuñ hai

agar achchhe nahīñ ho tum to ālam-mubtalā kyuuñ hai

ḳhudā jaane tarīqa husn-o-ulfat kā judā kyuuñ hai

maiñ itnā bā-vafā kyuuñ huuñ vo itnā be-vafā kyuuñ hai

adū ko kyuuñ alag karte ho rasm-e-jaur-e-be-jā meñ

vafāoñ meñ to shāmil thā jafāoñ meñ judā kyuuñ hai

vo sun kar shikva-e-ishq-e-adū kis naaz se bole

tumhārā mubtalā hogā hamārā mubtalā kyuuñ hai

mohabbat us pe zāhir hazrat-e-dil kījiye lekin

javāb aap is kā kyā deñge agar us ne kahā kyuuñ hai

zarā tum phir ye kah do sun ke shikva rashk-e-dushman kā

gavārā jab nahīñ phir chāhne kā hauslā kyuuñ hai

tum apne jaur meñ dushman kā hissa kyuuñ lagāte ho

sitam meñ ye sitam kyuuñ hai jafā meñ ye jafā kyuuñ hai

hasīnoñ par nahīñ martā maiñ is hasrat meñ martā huuñ

ki aise aise logoñ ke liye zālim qazā kyuuñ hai

vo kahte haiñ ki kyuuñ jī jis ko tum chāho vo kyuuñ achchhā

vo achchhā kyuuñ hai aur ham jis ko chāheñ vo burā kyuuñ hai

vo pahlī sab vafā.eñ kyā huiiñ ab ye jafā kaisī

vo pahlī sab adā.eñ kyā huiiñ ab ye adā kyuuñ hai

tirā tark-e-sitam bhī ik sitam hai ye sitam kaisā

tirī tark-e-jafā bhī ik jafā hai ye jafā kyuuñ hai

ġhubār-e-nā-tavāñ kyuuñ un ke kūche se uḌātī hai

miTe to ham tujhe itnī kudūrat ai sabā kyuuñ hai

ḳhudā se māñgtā huuñ maut apnī is liye 'muztar'

ye sunñā hai kisī se kyuuñ ye marne kī duā kyuuñ hai

ye nahaq inkisar-e-jalwa-e-hairat-faza kyun hai

agar achchhe nahin ho tum to aalam-mubtala kyun hai

KHuda jaane tariqa husn-o-ulfat ka juda kyun hai

main itna ba-wafa kyun hun wo itna be-wafa kyun hai

adu ko kyun alag karte ho rasm-e-jaur-e-be-ja mein

wafaon mein to shamil tha jafaon mein juda kyun hai

wo sun kar shikwa-e-ishq-e-adu kis naz se bole

tumhaara mubtala hoga hamara mubtala kyun hai

mohabbat us pe zahir hazrat-e-dil kijiye lekin

jawab aap is ka kya denge agar us ne kaha kyun hai

zara tum phir ye kah do sun ke shikwa rashk-e-dushman ka

gawara jab nahin phir chahne ka hausla kyun hai

tum apne jaur mein dushman ka hissa kyun lagate ho

sitam mein ye sitam kyun hai jafa mein ye jafa kyun hai

hasinon par nahin marta main is hasrat mein marta hun

ki aise aise logon ke liye zalim qaza kyun hai

wo kahte hain ki kyun ji jis ko tum chaho wo kyun achchha

wo achchha kyun hai aur hum jis ko chahen wo bura kyun hai

wo pahli sab wafaen kya huin ab ye jafa kaisi

wo pahli sab adaen kya huin ab ye ada kyun hai

tera tark-e-sitam bhi ek sitam hai ye sitam kaisa

teri tark-e-jafa bhi ek jafa hai ye jafa kyun hai

ghubar-e-na-tawan kyun un ke kuche se uDati hai

miTe to hum tujhe itni kudurat ai saba kyun hai

KHuda se mangta hun maut apni is liye 'muztar'

ye sunna hai kisi se kyun ye marne ki dua kyun hai