rahe hum raaz-dar-e-ulfat-e-parda-nashin barson

rahe ham rāz-dār-e-ulfat-e-parda-nashīñ barsoñ

chhupāyā jeb ke parde meñ chāk-e-āstīñ barsoñ

pas-e-murdan mirā mātam rahegā har kahīñ barsoñ

lahū ro.egā gardūñ ḳhaak uḌā.egī zamīñ barsoñ

kuchh aisā ban paḌā naqsha ki sab naqshoñ se achchhā thā

rahā ḳhud mahv-e-shakl-e-yār sūrat-āfrīñ barsoñ

mirī turbat pe phuul us ne chaḌhā kar ye duā māñgī

ḳhudāvandā phalī-phūlī rahe ye sar-zamīñ barsoñ

rahe jaame se bāhar dast-e-vahshat josh-e-vahshat meñ

junūñ meñ ham ne pahnā jāma-e-be-āstīñ barsoñ

mohabbat meñ miTāyā muddatoñ taqdīr kā likkhā

ghisī sañg-e-dar-e-dildār par apnī jabīñ barsoñ

hamārā dam nahīñ niklegā jab tak tum na aaoge

tumhārī raah dekhegī nigāh-e-vāpsīñ barsoñ

na tum aa.e na apnī yaad ko bhejā mire dil meñ

ye vo ghar hai ki jis ko tum ne rakhā be-makīñ barsoñ

hamāre josh-e-vahshat par garebāñ muskurāyā hai

hañsā hai baḳhiya-e-dāman pe chāk-e-āstīñ barsoñ

udhar har vaar par qātil ko barsoñ lutf aayā hai

idhar har zaḳhm ne dī hai sadā-e-āfrīñ barsoñ

dam-e-āḳhir to aa kar mushkileñ āsān kar jaao

duā.eñ aap ko degī mirī jān-e-hazīñ barsoñ

vahī ab ba.ad-e-murdan qabr par aañsū bahāte haiñ

na aayā thā jinheñ merī mohabbat kā yaqīñ barsoñ

judā.ī meñ ye dhaḌkā thā ki aañch un par na aa jaaye

bujhā.ī āñsuoñ se ham ne āh-e-ātishīñ barsoñ

agar us but kā jalva dekh le chakkar meñ aa jaaye

sar-e-bāzār nāche zāhid-e-ḳhalvat-nashīñ barsoñ

ġhazab dekho butoñ ne us se apnā naam japvāyā

rahī thī jis zabāñ par yād-e-rabbul-ālamīñ barsoñ

mujhe nāshād kar ke āsmāñ rāhat na pā.egā

mujhe barbād kar ke ḳhaak chhāneī zamīñ barsoñ

mire mātam meñ kājal ban ke armāñ bah gayā 'muztar'

lahū ke āñsuoñ roī vo chashm-e-surmagīñ barsoñ

usī kī dast-e-vahshat ne uḌā diiñ dhajjiyāñ 'muztar'

rahī thī dīda-e-namnāk par jo āstīñ barsoñ

rahe hum raaz-dar-e-ulfat-e-parda-nashin barson

chhupaya jeb ke parde mein chaak-e-astin barson

pas-e-murdan mera matam rahega har kahin barson

lahu roega gardun KHak uDaegi zamin barson

kuchh aisa ban paDa naqsha ki sab naqshon se achchha tha

raha KHud mahw-e-shakl-e-yar surat-afrin barson

meri turbat pe phul us ne chaDha kar ye dua mangi

KHudawanda phali-phuli rahe ye sar-zamin barson

rahe jame se bahar dast-e-wahshat josh-e-wahshat mein

junun mein hum ne pahna jama-e-be-astin barson

mohabbat mein miTaya muddaton taqdir ka likkha

ghisi sang-e-dar-e-dildar par apni jabin barson

hamara dam nahin niklega jab tak tum na aaoge

tumhaari rah dekhegi nigah-e-wapsin barson

na tum aae na apni yaad ko bheja mere dil mein

ye wo ghar hai ki jis ko tum ne rakha be-makin barson

hamare josh-e-wahshat par gareban muskuraya hai

hansa hai baKHiya-e-daman pe chaak-e-astin barson

udhar har war par qatil ko barson lutf aaya hai

idhar har zaKHm ne di hai sada-e-afrin barson

dam-e-aKHir to aa kar mushkilen aasan kar jao

duaen aap ko degi meri jaan-e-hazin barson

wahi ab baad-e-murdan qabr par aansu bahate hain

na aaya tha jinhen meri mohabbat ka yaqin barson

judai mein ye dhaDka tha ki aanch un par na aa jaye

bujhai aansuon se hum ne aah-e-atishin barson

agar us but ka jalwa dekh le chakkar mein aa jaye

sar-e-bazar nache zahid-e-KHalwat-nashin barson

ghazab dekho buton ne us se apna nam japwaya

rahi thi jis zaban par yaad-e-rabbul-alamin barson

mujhe nashad kar ke aasman rahat na paega

mujhe barbaad kar ke KHak chhanei zamin barson

mere matam mein kajal ban ke arman bah gaya 'muztar'

lahu ke aansuon roi wo chashm-e-surmagin barson

usi ki dast-e-wahshat ne uDa din dhajjiyan 'muztar'

rahi thi dida-e-namnak par jo aastin barson