ai ishq ata kar de aisa mujhe kashana

ai ishq atā kar de aisā mujhe kāshāna

jo ka.abe kā ka.aba ho but-ḳhāne kā but-ḳhāna

mahrūm-e-tajallī hai muddat se ye kāshāna

aa jā mire madfan meñ o jalva-e-jānāna

saaqī ko dikhā.ūñgā ye shān-e-faqīrāna

phūTī huī ik botal TuuTā huā paimāna

sāġhar hai na miinā hai shīsha hai na paimāna

jis din se gayā saaqī sunsān hai mai-ḳhāna

ik aisī jhalak de jā o jalva-e-jānāna

lailā bhī pukār uTThe majnūñ to thā dīvāna

chheḌo na farishto tum zikr-e-ġham-e-jānāna

kyuuñ yaad dilāte ho bhūlā huā afsāna

yuuñ hashr meñ uTThā hai saaqī tirā mastāna

ik haath meñ botal hai ik haath meñ paimāna

hai ulfat-e-sāqī meñ mashrab mirā rindāna

ai paik-e-qazā tū hī bhar de mirā paimāna

miTTī mirī dāman se saaqī ne chhuḌā Daalī

maiñ to ye samjhā thā ban jā.egā paimāna

ye chashm-e-haqīqat-bīñ kyā dekhe sivā tere

sajde se hameñ matlab ka.aba ho ki but-ḳhāna

ai jalve kī nairañgī kuchh naam to raushan kar

dāmān-e-tajallī par likh de mirā afsāna

yārab mire lene ko kyuuñ tū ne qazā bhejī

apnoñ ko kabhī lene aatā nahīñ begāna

ai jalva-e-sad-ḳhalvat kab tum meñ rahūñ 'muztar'

le le mirī hushyārī kar de mujhe dīvāna

ai ishq ata kar de aisa mujhe kashana

jo kabe ka kaba ho but-KHane ka but-KHana

mahrum-e-tajalli hai muddat se ye kashana

aa ja mere madfan mein o jalwa-e-jaanana

saqi ko dikhaunga ye shan-e-faqirana

phuTi hui ek botal TuTa hua paimana

saghar hai na mina hai shisha hai na paimana

jis din se gaya saqi sunsan hai mai-KHana

ek aisi jhalak de ja o jalwa-e-jaanana

laila bhi pukar uTThe majnun to tha diwana

chheDo na farishto tum zikr-e-gham-e-jaanana

kyun yaad dilate ho bhula hua afsana

yun hashr mein uTTha hai saqi tera mastana

ek hath mein botal hai ek hath mein paimana

hai ulfat-e-saqi mein mashrab mera rindana

ai paik-e-qaza tu hi bhar de mera paimana

miTTi meri daman se saqi ne chhuDa Dali

main to ye samjha tha ban jaega paimana

ye chashm-e-haqiqat-bin kya dekhe siwa tere

sajde se hamein matlab kaba ho ki but-KHana

ai jalwe ki nairangi kuchh nam to raushan kar

daman-e-tajalli par likh de mera afsana

yarab mere lene ko kyun tu ne qaza bheji

apnon ko kabhi lene aata nahin begana

ai jalwa-e-sad-KHalwat kab tum mein rahun 'muztar'

le le meri hushyari kar de mujhe diwana