hijab-e-KHas ke parde uThe hain kaif-o-masti mein

hijāb-e-ḳhās ke parde uThe haiñ kaif-o-mastī meñ

na jaane kis kī hastī dekhtā huuñ apnī hastī meñ

na bahkā aaj tak maiñ nashsha-e-ulfat kī mastī meñ

butoñ ko bhī agar puujā to puujā haq-parastī meñ

na so.e chādar-e-gul par kabhī duniyā kī bastī meñ

sadā kāñTe hī chunte kaT ga.ī gulzār-e-hastī meñ

lagī us sho.ala-e-ruḳhsār kī baaqī rahī yūñhī

to sun lenā ki ik din mar gayā ātish-parastī meñ

mirī turbat pe ḳhud saaqī ne aa kar ye duā māñgī

ḳhudā baḳhshe bahut achchhī guzārī mai-parastī meñ

mire qātil kī jaldī ne mujhe nākām hī rakhā

tamannā dekhne kī bhī na niklī tez-dastī meñ

ba-rañg-e-kāsa-e-taqdīr gardish hī maiñ din guzre

pyāla ban ke maiñ ne umr kaaTī mai-parastī meñ

nirālī shaan se niklā huuñ terī justujū karne

mohabbat rahnumā.ī meñ hai vahshat sarparastī meñ

talāsh-e-but meñ mujh ko dekh kar jannat meñ sab bole

ye kāfir kyuuñ chalā aayā musalmānoñ kī bastī meñ

bayābān-e-ġharībī meñ basar kartā huuñ muddat se

vatan jis din se chhoḌā jī nahīñ lagtā hai bastī meñ

hijab-e-KHas ke parde uThe hain kaif-o-masti mein

na jaane kis ki hasti dekhta hun apni hasti mein

na bahka aaj tak main nashsha-e-ulfat ki masti mein

buton ko bhi agar puja to puja haq-parasti mein

na soe chadar-e-gul par kabhi duniya ki basti mein

sada kanTe hi chunte kaT gai gulzar-e-hasti mein

lagi us shoala-e-ruKHsar ki baqi rahi yunhi

to sun lena ki ek din mar gaya aatish-parasti mein

meri turbat pe KHud saqi ne aa kar ye dua mangi

KHuda baKHshe bahut achchhi guzari mai-parasti mein

mere qatil ki jaldi ne mujhe nakaam hi rakha

tamanna dekhne ki bhi na nikli tez-dasti mein

ba-rang-e-kasa-e-taqdir gardish hi main din guzre

pyala ban ke main ne umr kaTi mai-parasti mein

nirali shan se nikla hun teri justuju karne

mohabbat rahnumai mein hai wahshat sarparasti mein

talash-e-but mein mujh ko dekh kar jannat mein sab bole

ye kafir kyun chala aaya musalmanon ki basti mein

bayaban-e-gharibi mein basar karta hun muddat se

watan jis din se chhoDa ji nahin lagta hai basti mein