buton mein nur-e-zat-e-kibriya malum hota hai

butoñ meñ nūr-e-zāt-e-kibriyā ma.alūm hotā hai

mujhe kuchh din se har patthar ḳhudā ma.alūm hotā hai

hijāb-e-ishq meñ but kibriyā ma.alūm hotā hai

baḌe sañgīn parde meñ ḳhudā ma.alūm hotā hai

maraz ulfat kā paiġhām-e-qazā ma.alūm hotā hai

ye dard-e-lā-davā mujh ko davā ma.alūm hotā hai

miyān-e-tishnagī pyāsoñ ne aisī lazzateñ lūTīñ

ki āb-e-teġh-e-qātil be-mazā ma.alūm hotā hai

na pūchho kyuuñ maiñ ka.abe jā ke but-ḳhāne chalā aayā

akelā ghar to duniyā ko burā ma.alūm hotā hai

madīna jā ke koī tishna-lab vāpas nahīñ aatā

ye saaqī bhī saḳhāvat meñ ḳhudā ma.alūm hotā hai

maiñ itnā arsh se ūñchā gayā zor-e-mohabbat meñ

ki uupar se bahut nīche ḳhudā ma.alūm hotā hai

vahāñ jā kar kiye haiñ maiñ ne sajde apnī hastī ko

jahāñ banda pahuñch kar ḳhud ḳhudā ma.alūm hotā hai

ḳhudā bhī jab na ho ma.alūm tab jaano miTī hastī

fanā kā kyā mazā jab tak ḳhudā ma.alūm hotā hai

butoñ ke ishq meñ ġhaflat ke parde uTh ga.e 'muztar'

jab āñkheñ band kartā huuñ ḳhudā ma.alūm hotā hai

buton mein nur-e-zat-e-kibriya malum hota hai

mujhe kuchh din se har patthar KHuda malum hota hai

hijab-e-ishq mein but kibriya malum hota hai

baDe sangin parde mein KHuda malum hota hai

maraz ulfat ka paigham-e-qaza malum hota hai

ye dard-e-la-dawa mujh ko dawa malum hota hai

miyan-e-tishnagi pyason ne aisi lazzaten luTin

ki aab-e-tegh-e-qatil be-maza malum hota hai

na puchho kyun main kabe ja ke but-KHane chala aaya

akela ghar to duniya ko bura malum hota hai

madina ja ke koi tishna-lab wapas nahin aata

ye saqi bhi saKHawat mein KHuda malum hota hai

main itna arsh se uncha gaya zor-e-mohabbat mein

ki upar se bahut niche KHuda malum hota hai

wahan ja kar kiye hain main ne sajde apni hasti ko

jahan banda pahunch kar KHud KHuda malum hota hai

KHuda bhi jab na ho malum tab jaano miTi hasti

fana ka kya maza jab tak KHuda malum hota hai

buton ke ishq mein ghaflat ke parde uTh gae 'muztar'

jab aankhen band karta hun KHuda malum hota hai