pabandi-e-ulfat ne sab chhin li aazadi

pābandī-e-ulfat ne sab chhīn lī āzādī

ai husn-e-jafā-pesha sun shikva-e-barbādī

barbādi-e-kāmil meñ thoḌī sī kasar pā kar

us ne mirī mayyat bhī madfan se nikalvā dī

saaqī ne pas-e-murdan pyāsā na mujhe chhoḌā

ik abr ke TukḌe se mai qabr pe barsā dī

vahdat ke ta.alluq meñ kasrat kā mazā aatā

ka.abe meñ agar hotī but-ḳhāne kī ābādī

maidān-e-qayāmat meñ dhūpoñ kā sahārā thī

lekin tire jalve ne kamlī mirī jalvā dī

lailā-e-madīna ne āñkhoñ se kiyā parda

ka.abe ko bhī mātam kī poshāk badalvā dī

'muztar' mujhe chāhat meñ sajdoñ kī zarūrat kyā

ḳhāk-e-dar-e-jānāñ ne qismat mirī chamkā dī

pabandi-e-ulfat ne sab chhin li aazadi

ai husn-e-jafa-pesha sun shikwa-e-barbaadi

barbaadi-e-kaamil mein thoDi si kasar pa kar

us ne meri mayyat bhi madfan se nikalwa di

saqi ne pas-e-murdan pyasa na mujhe chhoDa

ek abr ke TukDe se mai qabr pe barsa di

wahdat ke talluq mein kasrat ka maza aata

kabe mein agar hoti but-KHane ki aabaadi

maidan-e-qayamat mein dhupon ka sahaara thi

lekin tere jalwe ne kamli meri jalwa di

laila-e-madina ne aankhon se kiya parda

kabe ko bhi matam ki poshak badalwa di

'muztar' mujhe chahat mein sajdon ki zarurat kya

KHak-e-dar-e-jaanan ne qismat meri chamka di