dam-e-KHwab-e-rahmat bulaya unhonne to dard-e-nihan ki kahani kahunga

dam-e-ḳhvāb-e-rahmat bulāyā unhoñne to dard-e-nihāñ kī kahānī kahūñgā

mirā haal likhne ke qābil nahīñ hai agar mil ga.e to zabānī kahūñgā

lab-e-jū-e-ulfat ramā.ī hai dhonī yahāñ qissa-e-saḳht-jānī kahūñgā

idhar aa idhar rūh-e-shīrīñ idhar aa tire kohkan kī kahānī kahūñgā

ḳhizar tere chashme kā paanī hai achchhā magar maiñ ise mauj-e-fānī kahūñgā

mohabbat kā maarā huā dil jilā de maiñ tab tere paanī ko paanī kahūñgā

azal meñ hī tujh par nazar paḌ chukī hai na kar mujh se inkār-e-jalva-numā.ī

tajallī tirī go na.ī raushnī hai magar maiñ to is ko purānī kahūñgā

mohabbat meñ inkār-e-jalva-numā.ī zarā is tarīqe ko tū yaad rakhnā

agar maiñ kabhī tere darje pe pahuñchā to maiñ bhī yūñhī lan-tarānī kahūñgā

tirī zāt-e-vāhid hai bedār-e-mutlaq tujhe to kabhī niiñd aatī nahīñ hai

tirī aañkh lagne kī hasrat meñ yārab kahāñ tak maiñ qisse-kahānī kahūñgā

vo ik ā.īna jis meñ muñh dekhte haiñ kisī ek kā vaqf-e-sūrat nahīñ hai

yahīñ se natīja uThā kar duī kā maiñ vahdat ko kasrat kā baanī kahūñgā

ye hastī kā shīsha jo tū ne diyā hai zarā is pe chāhat kī saiqal to kar luuñ

ye ho jaaye phir apnī sūrat ko maiñ bhī tirī zaat kā naqsh-e-sānī kahūñgā

maiñ kyā bevafā huuñ ki mahshar meñ qātil ḳhudā se karūñ shikva-e-qatl apnā

zamāna kahe ḳhūn-e-nāhaq bahāyā agar mujh se pūchhā to paanī kahūñgā

kabhī bāġhbāñ ne bulāyā jo 'muztar' to kāñTe dikhā.ūñgā jo chubh chuke haiñ

kaleje meñ khaTke vo charchā karūñgā jo dil meñ chubhe vo kahānī kahūñgā

dam-e-KHwab-e-rahmat bulaya unhonne to dard-e-nihan ki kahani kahunga

mera haal likhne ke qabil nahin hai agar mil gae to zabani kahunga

lab-e-ju-e-ulfat ramai hai dhoni yahan qissa-e-saKHt-jaani kahunga

idhar aa idhar ruh-e-shirin idhar aa tere kohkan ki kahani kahunga

KHizar tere chashme ka pani hai achchha magar main ise mauj-e-fani kahunga

mohabbat ka mara hua dil jila de main tab tere pani ko pani kahunga

azal mein hi tujh par nazar paD chuki hai na kar mujh se inkar-e-jalwa-numai

tajalli teri go nai raushni hai magar main to is ko purani kahunga

mohabbat mein inkar-e-jalwa-numai zara is tariqe ko tu yaad rakhna

agar main kabhi tere darje pe pahuncha to main bhi yunhi lan-tarani kahunga

teri zat-e-wahid hai bedar-e-mutlaq tujhe to kabhi nind aati nahin hai

teri aankh lagne ki hasrat mein yarab kahan tak main qisse-kahani kahunga

wo ek aaina jis mein munh dekhte hain kisi ek ka waqf-e-surat nahin hai

yahin se natija uTha kar dui ka main wahdat ko kasrat ka bani kahunga

ye hasti ka shisha jo tu ne diya hai zara is pe chahat ki saiqal to kar lun

ye ho jaye phir apni surat ko main bhi teri zat ka naqsh-e-sani kahunga

main kya bewafa hun ki mahshar mein qatil KHuda se karun shikwa-e-qatl apna

zamana kahe KHun-e-nahaq bahaya agar mujh se puchha to pani kahunga

kabhi baghban ne bulaya jo 'muztar' to kanTe dikhaunga jo chubh chuke hain

kaleje mein khaTke wo charcha karunga jo dil mein chubhe wo kahani kahunga