dekhna hai saqi-e-asli ka mai-KHana mujhe

dekhnā hai sāqī-e-aslī kā mai-ḳhāna mujhe

ab to uupar khīñch le ai daur-e-paimāna mujhe

ālam-e-lāhūt kī miTTī tau maiñ nai chhān lī

ab kahāñ le jā.egā tū kar ke dīvāna mujhe

maiñ añdherī gor huuñ aur tū tajallī tuur kī

raushnī de jā charāġh-e-rū-e-jānāna mujhe

maiñ ne hastī apnī taj dī us kī rasm-e-ishq meñ

lekin is par bhī samajhtā hai vo begāna mujhe

merī chashm-e-shauq ne vahdat kā naqsha khīñch kar

ḳhaas ka.abe meñ dikhāyā hai sanam-ḳhāna mujhe

maiñ tirī ummīd meñ hastī miTā kar miT gayā

ab to ik Thokar lagā de pā-e-jānāna mujhe

chashm-e-sāġhar se ravāñ rahte haiñ har-dam ashk se

aaj tak rotā hai 'muztar' merā but-ḳhāna mujhe

dekhna hai saqi-e-asli ka mai-KHana mujhe

ab to upar khinch le ai daur-e-paimana mujhe

aalam-e-lahut ki miTTi tau main nai chhan li

ab kahan le jaega tu kar ke diwana mujhe

main andheri gor hun aur tu tajalli tur ki

raushni de ja charagh-e-ru-e-jaanana mujhe

main ne hasti apni taj di us ki rasm-e-ishq mein

lekin is par bhi samajhta hai wo begana mujhe

meri chashm-e-shauq ne wahdat ka naqsha khinch kar

KHas kabe mein dikhaya hai sanam-KHana mujhe

main teri ummid mein hasti miTa kar miT gaya

ab to ek Thokar laga de pa-e-jaanana mujhe

chashm-e-saghar se rawan rahte hain har-dam ashk se

aaj tak rota hai 'muztar' mera but-KHana mujhe