be-parda lagi dil ki badnam yahan kar di

be-parda lagī dil kī badnām yahāñ kar dī

dil le ke ye kyā hālat ai jān-e-jahāñ kar dī

kis laġhzish-e-bejā par mai-noshoñ se rūThā hai

kyuuñ suunī mirī bastī ai pīr-e-muġhāñ kar dī

dardoñ kī davā denā ye kaam to terā hai

is dil kī jo hālat thī vo maiñ ne bayāñ kar dī

ik qatra-e-mai de kar vahdat meñ Duboyā hai

saaqī ne mirī kashtī dariyā meñ ravāñ kar dī

ye mashq-e-jafā kuchh din yuuñ hī jo rahī jaarī

sun lenā ki sab duniyā benām-o-nishāñ kar dī

āñkhoñ meñ tire ghar kā naqsha nazar aatā hai

ka.abe kī siyah-poshī putlī se ayaañ kar dī

ye umr tumheñ 'muztar' duniyā meñ na khonī thī

tum ne to baḌī daulat barbād yahāñ kar dī

be-parda lagi dil ki badnam yahan kar di

dil le ke ye kya haalat ai jaan-e-jahan kar di

kis laghzish-e-beja par mai-noshon se ruTha hai

kyun suni meri basti ai pir-e-mughan kar di

dardon ki dawa dena ye kaam to tera hai

is dil ki jo haalat thi wo main ne bayan kar di

ek qatra-e-mai de kar wahdat mein Duboya hai

saqi ne meri kashti dariya mein rawan kar di

ye mashq-e-jafa kuchh din yun hi jo rahi jari

sun lena ki sab duniya benam-o-nishan kar di

aankhon mein tere ghar ka naqsha nazar aata hai

kabe ki siyah-poshi putli se ayan kar di

ye umr tumhein 'muztar' duniya mein na khoni thi

tum ne to baDi daulat barbaad yahan kar di