بے پردہ لگی دل کی بدنام یہاں کر دی

بے پردہ لگی دل کی بدنام یہاں کر دی

دل لے کے یہ کیا حالت اے جان جہاں کر دی

کس لغزش بے جا پر مے نوشوں سے روٹھا ہے

کیوں سونی مری بستی اے پیر مغاں کر دی

دردوں کی دوا دینا یہ کام تو تیرا ہے

اس دل کی جو حالت تھی وہ میں نے بیاں کر دی

اک قطرۂ مے دے کر وحدت میں ڈبویا ہے

ساقی نے مری کشتی دریا میں رواں کر دی

یہ مشق جفا کچھ دن یوں ہی جو رہی جاری

سن لینا کہ سب دنیا بے نام و نشاں کر دی

آنکھوں میں ترے گھر کا نقشہ نظر آتا ہے

کعبے کی سیہ پوشی پتلی سے عیاں کر دی

یہ عمر تمہیں مضطرؔ دنیا میں نہ کھونی تھی

تم نے تو بڑی دولت برباد یہاں کر دی