kis shan se uTha hai saqi tera mastana

kis shaan se uThā hai saaqī tirā mastāna

hūreñ liye aatī haiñ paimāne pe paimāna

māthā maiñ ragaḌtā huuñ qismat mirī chamkā de

tujh meñ to sharāre haiñ sañg-e-dar-e-jānāna

nairañgī-e-vahdat se majnūñ kā ye naqsha hai

sūrat to hai lailā kī aur bhes hai mardāna

jis din se duī maiñ ne kho dī hai usī din se

ḳhud nūr-e-haqīqat huuñ ḳhud jalva-e-jānāna

dil merā ma.e-e-hasrat madfan meñ bhī saath aayā

madfan na kaho us ko ye hai mirā ġham-ḳhāna

le ḳhalvat-e-madfan meñ 'muztar' tirā aa pahuñchā

ab chhoḌ de ai vahdat andāz-e-hijābāna

kis shan se uTha hai saqi tera mastana

huren liye aati hain paimane pe paimana

matha main ragaDta hun qismat meri chamka de

tujh mein to sharare hain sang-e-dar-e-jaanana

nairangi-e-wahdat se majnun ka ye naqsha hai

surat to hai laila ki aur bhes hai mardana

jis din se dui main ne kho di hai usi din se

KHud nur-e-haqiqat hun KHud jalwa-e-jaanana

dil mera mae-e-hasrat madfan mein bhi sath aaya

madfan na kaho us ko ye hai mera gham-KHana

le KHalwat-e-madfan mein 'muztar' tera aa pahuncha

ab chhoD de ai wahdat andaz-e-hijabana